Aafia Tagata Galulue Faavaitaimi I Niu Sila Ona O Lologa

Tagata Galulue Faavaitaimi

Ata Pueina: Google Image

O le ogaoga o aafiaga o lologa ua pagatia ai le taulaga o Hawkes Bay i Aotearoa ua mafua ai ona fa'amalolo le taufaiselau o tagata faigaluega faavaitaimi i le vaiaso talu ai.

Peitai, o loʻo taumafai le ekalesia o le King's House i Napier e fesoasoani ia i latou nei ua puapuagatia ona o lea mala faalenatura.

O le toatele o tagata Samoa o lo'o faigaluega fa'avaitaimi mo le kamupani o le Mr Apple Orchards na faaleagaina nofoaga o loo nonofo ai ona o le matuia o lologa. Sa vaaia i luga o televise ma i latou ua sulufai i le tumutumu o apa o  fale o loo aumau ai ona ua loloto lologa.

Na ta‘ua e Dolvin Maselusi, o lē e galue i se togalaau ‘aina ae e le‘i a‘afia i lologa, na pa‘ulia i latou mo sina taimi.

“Sa ou lagona le faanoanoa mo i latou ona sa o latou mafatia ona o le matautia o lologa. E le mafai ona vave oo atu le fesoasoani ia i latou ona ua tapunia auala ma alalaupapa,” o lana tala lea.

Fai mai Fiona Whiteridge, o le Pule Sili o Tagata Sulufaʻi ma Migrant Services i le MBIE, e leai nisi na faamanuʻalia, e ui lava e tusa ma le 690 tagata faigaluega o loo fesosoani iai le National Emergency Management Agency (NEMA) poo le Ofisa mo Faalavelave Tutupu Faafuasei a le Malo o Niu Sila.

E ono nofoaga o le Pasefika na fa’atulaga i le vaiaso na te’a nei, e fa’anofo ai le au faigaluega le tumau ua puapuagatia, e aofia ai ma le Kings House Church i Napier.

Fai mai le taitai o le Ekalesia, Charles Faletutulu, e tusa ma le 400 tagata faigaluega na nonofo i le latou nofoaga i le po muamua. O le to'atele ua toe si'i atu i nofoaga e sili atu ona talafeagai.

“E maligi ou loimata, pe a mafaufau i mea na latou oo i ai,” o lana tala lea.

“Na latou o mai ma ma tagapepa iila, po o se ato faafafa, ae ua faaleagaina ma leiloa le tele o a latou meatotino. O nisi na omai ma atopaʻu, ma na o le pau lena o le mea na totoe mai i lologa. Ou te masalo ua na o le alofa tunoa lava o le Atua ua mafai ai ona faasaoina i latou.”

Ua fa’apotopoto le mamalu lautele o le atunu’u e tu’uina atu le lagolago ma le fesoasoani e ala i foa’i, e aofia ai ma se tasi o Samaria lelei na malaga mai i le fa itula mai Ueligitone ma se afi (generator) e faaoga e i latou.

“E tele a matou moega. E iai a matou solo ma lavalava o loʻo sau i totonu. o tagata mai Peretania o loʻo lafo tupe ina ia mafai ona matou lagolagoina i laou ua aafia, ”o le tala lea a Faletutulu.