Toatolu Faamasino O Fanua Ma Suafa Ua Faamalolo

Fale Faamasino i Mulinuu.

Ata Pueina: Eyespy Radio 87.5 FM

Ua faamuta e le Komisi o Faamasinoga o Fanua ma Suafa le auaunaga a ni Faamasino e toatolu ina ua maea ona iloiloina le Tulafono o Faamasinoga o Fanua ma Suafa 2020.

O Faamasino ua faamalolo nei oTuioti Sakaria Taituave, Tuilagi Saipele Esera ma Iuga Sefo Fautuaalii.

O le faaiuga a le Komisi na faavae i le leai o se aiaiga i lalo o le LTC Act 2020 na tofia ai nei faamasino i le 2021.

O lena aiaiga sa iai i lalo o le Tulafaono Faavae a Faamasinoaga o Fanua ma Suafa 1981, ma na faaleaogaina ina ua pasia le Tulafono fou a le LTC 2020 i le Palemene ia Tesema 2020 ma amata faamamaluina ai loa ia Ianuari o le tausaga e 2021.

O Tuilagi, Tuioti ma Iuga na faatautoina e avea ma Faamasino ia Aperila 2021 e le Peresetene o Faamasinoga o Fanua ma Suafa i lena taimi, ia Fepulea’i Atila Ropati.

O latou tofiga na manatu e le tusa ai ma le tulafono ma o latou aso mulimuli o galuega o le 3 Mati 2023.