AMATA ALOAIA LE RESITALA MO LE MISS GLOBAL SAMOA 2023

Miss Global Samoa (Ata Pueina: Vodafone Samoa)

Mo tamaitai uma o lo'o fa'amoemoe e fia tauva i le Vodafone Miss Global Samoa mo lenei tausaga, ua fa'ailoa mai e le Vodafone Samoa, o le Aso 5 o Aukuso e tatala ai ai faagasologa o le resitala mo lea fa'amoemoe.

O le pepa resitala ma aiaiga mo le auai ai i le Vodafone Miss Global Samoa 2023 o lo'o maua i luga o le upegatafa'ilagi a le Vodafone Samoa i le www.vodafone.com.ws.

Mo i latou uma e fia tauva ma auai i lea sailiga tausala, e tatau ona ausia manaoga nei: (a) o oe o se tamaitai (b) e i le va o le 18 ma le 35 tausaga le matua o le soifua i le aso o le tauvaga (c) e le'i faaipoipo pe maitaga (d) mafai ona talanoa i le gagana Peretania/Igilisi (e) aua nei i lalo ifo o le 5'7" le umi poo le maualuga (f) o se tagata e iai lona tupuaga Samoa (g) masani ma iloa tu faapea aganuu a Samoa.

E amata ona tatalaina le resitala i luga o le initaneti mai i le aso 5 o Aokuso se ia faaiuina i le aso 5 o Setema 2023. E leai se totogi o le resitala mo le Tauvaga o le Miss Global Samoa. 

I le aso 29 o Setema, o le a fa'ailoa aloaia ai i latou e toavalu (8) filifilia mo fa'atalanoaga ma fa'amasino (fa'atalanoaga i luga o le initaneti mo tagata auai mai fafo atu o le Iunaite Setete o Amerika).

O le aso 5 o Oketopa i Samoa nei o le a faalauiloa ai le suafa o le Miss Global Samoa. Ina ia saunia le sui tauva mo le tauvaga faavaomalo i Vietnam mai le aso 11-25 o Novema o le tausaga nei, o le a faatautaia ai e le Manaia Events se polokalame tau a’oa’oga e 21 aso mo le o le a manumalo.

O se tinoitupe e $3000 Tala Samoa, o le iPhone 14, o se malaga fua i Vietnam e tausinio ai i le Miss Global 2023, atoa ai ma le tele o isi faailoga, o le a tuuina atu i le tamaitai manumalo i le tauvaga a le Vodafone Miss Global Samoa 2023.