FA'AILOA E VAOVASAMANAIA LANA 'AU FILIFILIA MO LE TA'ALOGA MA LE IKALE TAHI

Ata: Manu Samoa Facebook

Ua iai nei ni suiga i le 'au a le Manu Samoa mo lana ta'aloga ma le Ikale Tahi mai Toga i le Aso To'ona'i nei, e pei ona fa'ailoa mai e le Faia'oga Ulu o le 'au a le atunu'u ia Vaovasamanaia Seilala Mapusua.

O Charlie Faumuina, Sama Malolo, ma le ali'i kapeteni o le Manu Samoa ia Michael Alaalatoa ua tofia i le laina pito i luma o foueti (front row). 

O Chris Vui ma Brian Alainu'uese ua filifilia e avea ma loka (lock).

O Miracle Fai'ilagi o le a ta'alo i le tulaga o le blindside flanker, ae o le openside flanker ua tofia iai Jack Lam. 

O le numera 8 o le a  ta'alo ai le sa avea muamua ma sui o le All Blacks, le ali'i o Steven Luatua.

O le tulaga o le afa (9)o le a ta'alo ai Jonathan Taumateine, ae fesi (10) ai le ali'i o D'Angelo Leuila. O uigi taumatau ua iai nei Ed Fidow ma Nigel Ah Wong. O centres o Duncan Paia'aua ma Ulipano Junior Seuteni, ae fulupeki ai Tim Nanai Williams.

O fa'aleoleo ua iai nei Luteru Tolai, Titi Lamositele, Paul Alo-Emile, Theodore McFarland, Fritz Lee, Melani Matavao, Christian Lealiifano, ma Neria Foma’i.

O Samoa ua tulaga 13 nei i le fa'atulagaina o 'au lakapi a le lalolagi ina ua malolo i lana ta'aloga ma le 'au a Fiti i le vaiaso ua tuana'i, ma e tatau ona manumalo i le ta'aloga ma le Ikale Tahi i le aso a taeao ina ia toe si'itia ai i luga lona tulaga.