SAUNI LE 'AU TAMA'TA'I A SAMOA I LE MASTERS 40 MO LE I.V.F VA'A LONG DISTANCE CHAMPIONSHIPS
Ata Pueina: Samoa Country Magazine
A'o tapena ai le atunu'u e talimalo mo le tu'uga va'a alo tele a le lalolagi ua faaigoaina o le I.V.F Va'a Long Distance Championships 2023 i le Aso 10 - Aso 19 o Aukuso, ae o lea ua fa'ailoa mai e le 'au a tama'ita'i a Samoa o le a tauva i le vaega o le Masters 40, ua o latou lava sauni mo lea fa'amoemoe ua fa'atusaina o le Olimipeka lea mo lea ta'aloga o le alo va'a paopao po'o le outrigger canoeing.
O tama'ita'i ua tofia i totonu o le 'auva'a a Samoa mo le Masters 40, na filifilia mai i kalapu alo va'a paopao i Samoa nei ma atunu'u i fafo, ma ua atoa ai nei le 6 masina o fa'agasolo a latou tapenaga ma toleniga.
E tofu uma sui o le 'au ma tomai faapea agava'a eseese i le faatinoina o le ta'aloga. Ae e ui i lea, sa iai fo'i ni isi o lu'itau ma faigata sa feagai ai ma le 'au a'o tapena ai mo le tu'uga e pei ona taua e le latou kapeteni ia Moevanu Aiomanu Tupu i se faatalatalanoaga ma le leitio a le Eyespy.
O Moevanu o se tama'ita'i ua 30 tausaga o ta'alo ai i lea ta'aloga, ma na ia ta'ua. "Ia te a'u lava ia o le filifilia ai o a'u e avea ma kapeteni o se tiute tauave tele," o lana saunoaga lea.
"E tatau ona maua le malosi fa'aletino fa'apea ma le mafaufau, ma e mana'omia fo'i le saunia i taimi uma mo le tele o faafitauli eseese e tutupu i taaloga. Ae peitai i le faaiuga o toleniga, o le a avea nei faigata e luitauina ai i matou mo le aga'i i luma."
"O lea tofiga ou te taumafai ai fo'i e saili ni auala e maua ai le lotogatasi e nei tamaitai ina ia mafai ai ona lelei a matou taumafaiga mo le tu'uga o lo'o loma nei."
E silia i le 1000 tagata ta'aalo mai i le 28 atunu'u o le a autova'a mai mo le I.V.F Long Distance Championships 2023, ma o le tatalo a Moevanua i le mamalu o le atunu'u, "Afifio mai, susu mai, tatou tapua'ia le alo atu a nai au tama fanau mo lea fa'amoemoe aua se ai mo si o tatou atunuu pele."
Na ia faafetaia foi le kamupani a le No.1 Currency o lo'o lagolagoina le latou 'auva'a, fa'apea le ali'i faia'oga ia Su'a Jay Ah Fook ma lana soatau ia Tutasi Schuster mo le fesoasoani atu i a latou tapenaga.