FA'AMAVAE LE FAIAOGA O LE TOA SAMOA

Ua fa'amavae nei Matt Parish mai i le tofiga o le Faiaoga Ulu mo le Toa Samoa i le maea ai ona ia taitaia le au a le Toa Samoa i le suega siamupini o le Ipu o le Lalolagi o le Lakapi Liki i le tausaga ua tuana'i i Peretania, ma avea ai Samoa o le atunu'u muamua ua ausia lea matati'a.

O lea tulaga na fa'ailoa mai e le pepa o fa'amatalaga na tu'uina mai e le Pulega a le Lakapi Liki Samoa (Rugby League Samoa).

Na fa'ailoa e Parish i le Pulega fou o le Lakapi Liki Samoa lana fa'aiuga e fa'amavae i le Aso Tofi o le vaiaso nei, ma e silia ma le sefulu tausaga o galue ai o ia i lea tofiga.

O ia foi sa avea muamua ma faiaoga lagolago a le NSW i le State of Origin, ma ua tele lona sao i le taaloga faavaomalo, na ia tataia Samoa mo le tolu Ipu o le Lalolagi i le 2013, 2017,2021, fa'apea ai ma le Four Nations i le 2014 ma le tele o ta'aloga ma isi au a le Pasefika.

O le tausaga na sei mavae na fa'asuafaina ai Parish i le suafa Mauapule, ma na ia ta'ua, "O le avea ai o a'u ma faiaoga o le Toa Samoa i ia tausaga e tele e le mafai ona galo ma o le a manatua pea i le loto.

"Ae ou te lagona o le taimi lelei lenei mo a'u oute fa'amavae ai ae se'e mai se isi sui fou e avea ma faiaoga fou o le Toa Samoa.

"E lagona lava le mitamita o le agaga i le avea ai lea o ita ma sui o le 'au a le Toa Samoa ma ou te fa'afetaia tagata Samoa uma ona o le latou talia o a'u e pei lava o se tagata Samoa moni.

Na fa'afetaia e le Peresetene o le Lakapi Liki Samoa ia Ponifasio Vasa le afioga ia Mau-a-Pule mo lona sao tele i le taumafaiga o le 'au a le atunu'u.

“Sa e faia se sao taua i le manumalo iloga a le Toa Samoa ia Egelani i le le Ipu a le Lalolagi i le tausaga ua mavae lea o le a manatua pea e augatupulaga ma faamaumau i le talafaasolopito o taaloga a Samoa.

“Mau a Pule, o oe o se fa’amanuiaga mo Samoa, ma e matou momoli atu le fa’afetai tele lava mo au galuega. O le a tumau pea oe o se vaega taua o le aiga o le Toa Samoa ma matou te tulimatai atu i le faaauauina o lenei mafutaga i le atinaeina o le taaloga i Samoa.”