PA'ULIA LE VA'A O LE MV S.S.C FASEFULU I SALELOLOGA
MV S.S.C FASEFULU
O le taeao o le aso ananafi (Aso Gafua 21 o Aukuso) na pa'ulia ai le va'a a le Pulega o Va'a a Samoa (Samoa Shipping Corporation) ua fa'aigoaina o le S.S.C Fasefulu i le gataifale o le afioaga o Salelologa.
O lea va'a o lo'o femalaga'i ai tagata Samoa i le va o Upolu ma Salafai, ma na fa'amaonia mai e le Pulega e fa'apea o le mamalu o le pasese sa faimalaga i le MV Fasefulu fa'apea le aufaigaluega, o lo'o saogalemu uma i latou.
Sa fa'aoga ni va'a afi laiti e la'u ai i latou i uta mo le saogalemu. Na tu'uina e ni isi o le pasese ni ata video i luga o le upega tafailagi o lo'o pu'eina ai le pa'ulia o le MV Fasefulu i le a'au o Salelologa i le taeao o le aso ananafi.
Na faaalia foi i nei video le pasese o loo tutu i fafo o le nofoaga e paka ai taavale e aunoa ma se malutaga mai i le vevela o le la.
O le 2021 na paulia ai foi le vaa leoleo o le Nafanua i luga o le a'au i Salelologa. Na toe faafoi atu le vaa leoleo e $30 miliona i Ausetalia mo le lipeaina ma le toe fa'aleleia.
Ae i se taimi mulimuli ane ia Setema 2021 na le toe fa'aogaina ai ona o le faaleagaina.