AMATALIA LE FONO LONA 31 A LE SPREP

(Ata Pueina: SPREP)

O le nei vaiaso atoa o lo'o fa'atautaia ai i totonu o Samoa le fonotaga lona 31 a ofisa o le Polokalame i mataupu tau i le siosiomaga a le Itulagi o le Pasefika po o le SPREP.

O le fa'amoemoe autu o lenei fonotaga o le talanoaina lea e atunuu e 21 o le Pasefika o mataupu faatatau i le taitaiga o le Faalapotopotoga atoa ma le pasia o le fuafuaga faataatia mo le tausaga fou 2024.

O le afiafi o le Aso Gafua 4 o Setema na tatala aloaia ai lea fonotaga i le faletalimalo o le Taumeasina Island Resort, ma o le tamaitai Palemia o Samoa, Afioga Fiame Naomi Mataafa na saunoa e faamanatu i lea potopotoga nisi o itu tāua o loo manatu Samoa e ao ona tagai iai ma ia laualuga i talanoaga a Minisita o Siosiomaga o atunuu o le Pasefika o loo auai mai.

O ia itu taua e aofia ai suiga ogaoga o le tau, e pei ona saunoa Fiame o le taimi lenei i le Pasefika o loo ua iai i se tulaga faanatinati e tusa o lipoti o loo faailoa ai le aafiaga o le soifuaga o tatou tagata ma e lē mafai ona tatou tatalia suiga nei pe afai e lē foia le faafitauli o le tatala atu i le vateatea o kasa oona, ma faailoa ai foi le taumafai pea o Samoa ia ausia le pasene o le vevela e ao ona tausisia.

Sa ia faafetaia ai le sao tāua o le SPREP i taumafaiga uma e avatu ai se tuualalo mo le COP28 i Dubai.

E le gata i lea ae o tatou ogasami o se mataupu e le gata o loo iai foi taumafaiga a lenei faalapotopotoga ae ua tuuina atu e Samoa lana tuualalo i le faaaogāina pea o oloa gaosi mai le uga (plastic) lea o loo avea ma itu o loo aafia ai ogasami atoa ai ma fuafuaga a o tatou paaga ia latou meatau faaniukilia e faaleagaina ai le ogasami o le Pasefika.