FA'AGASOLO TA'ALOGA MA FIAFIAGA O LE TEUILA

Fa’agasolo Ta’aloga Ma Fa’afiafiaga O Le Teula Festival (Ata Peuina: Lars Gustaf Bell)

E ui i le a'asa o le la ma le vevela o le aso, ae e le'i avea lea itu e taofia ai le faatinoina o le vaega lona lua (heat 2) o ta'aloga fa'aleaganu'u ma fiafiaga o le Teuila e pei ona vaaia i le amataga o lenei vaiaso.

O le Ekalesia Metotisi mai i Papaloa Sinamoga ma le Mafutaga Tina mai i Leone sa ta'aalo ai i i lea aso i nisi o taaloga fa'aleaganu'u ma ta'aloga fa'aonaponei, sa fa'atautaia i tua o le Maota o le Malo i le Friendship Park.

Sa maua ai fo'i le avanoa e auai ma ta'aalo ai le mamalu o le atunuu fa'apea ai ma nisi o tagata tafafao mai i fafo i nei ta'aloga.

Na taua e se tasi o turisi na auai ia Gray Richardson 57-tausaga mai i Cheyenne Wyoming i le Unaite Setete o Amerika, e ese ma le matagofie o ituaiga aso nei ona e maua ai le fiafia ma le ata.

"O Samoa le atunu'u muamua o le lalolagi ua ou vaaia ai lea tulaga, e laumata fiafia uma tagata," o le saunoaga lea a Richardson.

Na taua e Nila Ioane mai i le Mafutaga Tina a Leone, ua leva ona o latou tapena ai i lenei tausaga. 

"E aoga fo'i lenei vaega ina ia fa'atumau ma fa'aolaola ai a tatou ta'aloga fa'aleaganu'u ina ne'i mou atu ma galo.

"Ma e aoga fo'i e fa'agaioi ai le tino.

O le i'uga o ta'aloga na manumalo ai Papaloa e 120 o latou togi, ae 114 Leone.

O le Aso Tofi o le a faia ai le suega siamupini o ia ta'aloga.