SAUNI HAYLANI MO LE ISI LA'ASAGA O LONA OLAGA

Miss Samoa 2022-2023, Haylani Kuruppu (Ata Pueina: Lars Gustaf Bell/ Eyespy Radio Samoa)

Na taua e Haylani Kuruppu o lo'o avea nei ma tausala o Samoa 2022-2023, ua ia sauni mo le isi la'asaga o lona olaga i le mae'a ai o lana paea'iga i lenei tausaga.

Na ia saunoa foi e uiga i lana faigamalaga a'o avea ai ma tausala o Samoa, e faigata ma sa iai foi faafitauli, ae na mafai lava ona ia fo'ia. 

"Sa matuai luitauina au i nisi o mataupu ma faafitauli, ae na auala mai ai nisi o a'oa'oga aoga mo lo'u nei tagata e uiga i auala e foi'a ma soalaupule ai. Na maua foi le avanoa oute malamalama atili ai i la tatou aganu'u aemaise o uiga ma agaifanua o nai o tatou tagata," o le saunoaga lea a Haylani.

O Haylani na fa'alauiloa foi se tasi o ana tusitusiga e fa'atatau i le tupulaga talavou.

Na ia momoli foi upu fa'amalosi loto i tamaitai e toasefulu (10) o le a tauva e avea ma tausala o Samoa i lenei tausaga. 

"Ia outou fa'ataua lenei mafutaga faaleusoga ua o outou maua. Pe fa'apaleina pe leai, ia maua pea o outou le fealofani ma le loto taumafai.

Na taua e Haylani a mae'a aloai'a lana paeaiga, o loo iai lona naunautaiga ia avea o ia ma se tasi o sui o le au pasiketipolo a Samoa mo Taaloga o le Pasefika ia Novema o le tausaga nei i Solomona.