TAOFIA LE TUMAU MALAGA A LE AIR NEW ZEALAND MO SAMOA

Ata Pueina: Stuff NZ

Ua taofia nei mo se taimi le tumau auaunaga lautele mo le faimalaga atu mo Samoa ma le faimalaga mai a le kamupani va'alele o le Air New Zealand ona ua faaleagaina nisi o meatotino e faaoga mo malaga.

Na taua e le kamupani vaalele na logoina i le po o le Aso Faraile ua fa'aleagaina mea faigaluega e manaomia mo le utaina ma le la’u ese mai o ato pa'u ma uta i luga o le vaalele tele o le ituaiga o le Boeing787 ma le 777.

Faaalia e le Faauluuluga o Auaunaga mo Atumotu o le Pasefika a le Air New Zealand ia Brent Roxburgh, i le 12 masina talu ai, sa galulue soosootauau ai le kamupani vaalele ma le latou paaga i Samoa ina ia mataituina tulaga saogalemu.

"Talu ai o le saogalemu o o tatou tagata o loʻo ave i ai le faʻamuamua, o lea na faia ai e le kamupani vaalele le valaau e taofi auaunaga lautele seʻia maeʻa faaleleia meafaigaluega," o le tala lea a Roxburgh.

"O loo galulue i le taimi nei le matou aufaigaluega e faaleleia uma ia tulaga. Ua faaopoopo foi se tasi o malaga mo le Aso Gafua 11 o Setema mo i latou na le mafai ona faataunuu a latou malaga i le vaiaso ua mavae.

"Ae o le aso taeao o le a toe tatala uma ai auaunaga masani mo Samoa. Peitai o le a faatapulaaina le aofai o i latou e mafai ona malaga.

“Matou te iloa o le a le fiafia le mamalu o tagata o loo faaogaina a matou auaunaga i lea tulaga, ae matou te faʻamalulu atu mo soʻo se faʻalavelave e ono tulai mai ona o lea tulaga le maalofia. Matou te fia faafetai atu ia i latou mo lo latou onosai a o matou galulue i lenei mataupu.

“Matou te iloa le taua tele o a matou auaunaga i totonu ma fafo atu o le itulagi o lea ia faaauau pea ona galulue vavalalata ma a matou paaga vaalele i Samoa ina ia mautinoa le mautinoa o auaunaga a le Air New Zealand i le itulagi.”