TOE SAINIA E LE MOANA PASIFIKA MIRACLE FAI'ILAGI MO LE 2024

Miracle Fai’ilagi (Ata Pueina: Moana Pasifika)

Ua toe fa'aauau nei mo le tausaga fou ona ta'alo ai le ali'i o Miracle Fai'ilagi mo le Moana Pasifika, e pei ona fa'ailoa mai e le Pulega a le 'au i le aso ananafi i se pepa o faamatalaga.

E toatolu tama ta'aalo e aofia ai Miracle fa'apea ai ma le 'auuso mai Toga ia Fine Inise ma Lotu Inise, ua toe filifilia i totonu o le 'au a le Moana Pasifika mo le tausaga fou.

O Miracle na filifilia e le Moana ma lana faiaoga talu ai o Aaron Mauger ona o le mataina o lana taalo i le World Rugby Pacific Combine i le tausaga ua mavae, sa faia i totonu o Fiti.

Na taua i se pepa o  faamatalaga mai le Moana Pasifika o Miracle na tulaga mataina lana ta'alo i ta'aloga uma ua tuana'i atu. 

Na manumalo foi o ia i le Niu Rookie of the Year 2022 i le laugatogi a le Moana Pasifika ina ua ia mauaina sikoa e 5 ao fa'agasolo ai le ta'amilosaga o le Supa Lakapi 2022.

O le mafuaaga lea ua faia ai le fa'ai'uga e le Moana e toe filifilia o ia mo le 2024.

O le taimi nei o lo'o i totonu o Farani le ali'i o Miracle o lo'o ta'alo ai mo le Manu Samoa i le Ipu o le Lalolagi o lenei tausaga.

Na ta'alo foi o ia i le Manu Samoa 7s fa'apea ai ma le Manuma, ma lana kalapu o Vaiala.