Auai Le Kolisi O Sanele I Se Polokalame E Taofia Ai Sauaga

Ata Pueina: Kolisi O Sanele

O se tasi o kolisi a le Lotu Katoliko i Samoa nei, le Kolisi o Sanele i Moamoa, ua atoa ai nei le ono o aoga e auai atu i totonu o le polokalame ua taua o le "Men & Boys Against Violence" poo le taofi atu lea e alii o le sauaina o tina ma tamaitai i Samoa nei.

O lea polokalame o loo limataitaia e le Faalapotopotoga o Sulufaiga mo Tagata ua Puapuagatia (Samoa Victim Support Group), ma o loo ua mafai ona faatinoina e le Faalapotopotoga ona o se fesoasoani tau seleni mai i le Malo o Samoa.

O le vaiaso nei na vaaia ai foi nisi o tama aoga mai le Kolisi o Sanele o avea ma avefua mo le latou aoga i se tauvaga ata documentary ua taua o le "Let Go and Let God Heal".

O le faamoemoe autu o le faatinoina ma le pueina o nei ata documentary, o le talanoaina lea o faafitauli ma nisi o aafiaga faalemafaufau o sauaga i totonu o aiga ia te i latou.

Sa taua e nisi o nei tama aoga mai i le Kolisi o Sanele, o le feau o loo molimoli atu e le latou ata sa pueina, e aoga mo le fanau lalovaoa, ina ia o latou faasoa atu foi nisi o faafitauli mai sauaga o loo latou puapuagatia ai. E le gata i lea, o le a iloa ai foi e ia fanau ua aafia i sauaga ona faasoa atu i o latou uo e faatatau lea i o latou faafitauli ina ia taofia ai ma maua ai se mapusaga.

O le Faalapotopotoga o Sulufaiga mo e ua Puapuagatia sa o latou amatalia lea faamoemoe ma le manatu autu ina ia aoaoina fanau tama laiti ao tuputupu ae, e le sa'o ma talafeagai sauaga, ma ia avea i latou ma ni tagata e taofi atu i lea faafitauli, ae le gata foi i lea ia avea i latou o ni tama e faia faataitaiga lelei i o latou fanau i le lumanai.

O le ata documentary a le Kolisi o Sanele o le a faalauiloa aloaia i le vaiaso fou lea e faauma ai le lua vaiaso o le "16 aso o le tetee atu i sauaga" o loo faagasolo pea.

O isi Kolisi e lima o loo i totonu foi o lea polokalame e aofia ai le Kolisi o Maluafou, Kolisi o Uesele, Kolisi o le Lotu Aso Fitu i Lalovaea, Aoga Faamatataeseese o Don Bosco, ma le Kolisi o Tuasivi mai i le motu tele i Salafai. O nei Kolisi e lima ua uma foi ona pueina a latou ata documentary ma o le a faalauiloa uma foi i le vaiaso fou.

I se faatalatalanoaga ma le Peresetene o le S.V.SG ia Siliniu Lina Chang, na ia taua ai, "O le mafuaaga na faatuina ai le S.V.S.G, ina ia fesoasoani atu ia i latou o loo ua puapuagatia ma sauaina. Matou te faatalatalanoa tama ma fanau tama, faapea foi ma i latou o loo faia ia sauaga ina ia maua le filemu ma taofia nei sauaga agai fanau teine ma tamaitai. O le auala lea a le S.V.S.G e unaia ai le faamoemoe o le aofia uma lea o tagata i totonu o a latou polokalame".