Taofia Aoaoga Mo Se Taimi Le Tumau

Ofisa O Le matagaluega o aoga.

Ata Pueina: Malo o Samoa

Ua faailoa mai nei e le Matagaluega o Aoga, Taaloga ma Aganuu le taofia le tumau ai lea o aoga uma i totonu o le atunuu faapea foi le taofia lea o le faatinoina o suega uma a le fanau o loo faagasolo i le taimi neI.

O lona uiga ua le mafai ona faatinoina le suega faapitoa mo le vasega sefulu na fuafua e faatino i le Aso Gafua 5 Novema.

O lea faasilasilaga na tuuina mai e le Matagaluega i luga o upega tafailagi po o le latou Tusi Foliga i le taeao o le Aso Gafua 5 Novema 2022 ina ua oso se fa'afuase'i se mafui'e i le 8:25am.

I se pepa o faamatalaga mai i le Ofisa o le Vaaitau o Samoa, sa taua mai ai e faapea o lea mafui'e na faamauina, e tusa lona malosi moa le 6.8 i le fua mafui'e ma le loloto e 35.5 kilomita sa afua mai i le motu o Toga i le mamao e tusa ma le 211.26 kilomiota mai i Saute i Sisifo o Apia.

O le mafua'aga lea ua taofia ai e le Matagaluega o Aoga, Taaloga ma Aganuu le faatinoga o suega uma a aoga sa atofa e faataunuu mo le Aso 5 Novema ona o le popolega i le ono lamatia lea o soifua a fanau aoga mai i se sunami poo se isi mafui'e e ono faafuaseia mai.

Na taua e le Pule Sili o le Matagaluega o Aoga, Taaloga ma Aganuu ia Tuumatavai Vau Peseta-Afamasaga i s faasilasilaga i luga o upega tafailagi, o le faatino ai e le Matagaluega o lea itu mo aoga uma ona o le faataua lea o le saogalemu o alo ma fanau aoga mai i le ono aafia i ni faalavelave faalenatura e aofia ai sunami ma mafui'e.

O lea lava Aso Gafua i le 9:00 na tuuina mai ai se faasilasilaga e le Ofisa o le Vaaitau e taofia uma ai falefaigaluega ma pisinisi, faapea aoga ae agai mo nofoaga maualuluga i nei faafuasei ona oso mai se sunami.

Peitai, o le ta o le 10:00am o lea lava aso na toe faasilasila mai ai le faaleaogaina o lea faasilasilaga sa faasalalau mai e le Ofisa o Vaaitau.

O le a toe logoina mai e le Matagaluega o Aoga, Taaloga ma Aganuu le atunuu i se taimi mulimuli ane pe faaauau pea lea lapataiga pe leai.