Sauni Le Manu Samoa Taitoafitu Mo Cape Town

Samoa Sevens.

Ata Pueina: HSBC 7s

E ui ina le manuia taumafaiga a le tatou 'au taitoafitu o le Manu Samoa i le faaiuga o le vaiaso ua mavae i Dubai lea na tulaga ono ai i le maea o lea taamilosaga, ae ua saunoa mai le alii faiaoga ia Muliagatele Brian Lima, e le o avea lea tulaga ma mea o le a faavaivai ai lana 'au ao sauni atu ai mo le vae o le a sosoo ai i le faaiuga o le vaiaso nei i Cape Town faapea le Olimipeka i Farani i le tausaga 2024.

O le Manu Samoa ua iai nei i le Pulu B faatasi ma Aialani, Urukuai, ma Iapani. mo le vae i Cape Town i Aferika i Saute lea o le a faatautaia i le Aso 9-11 o Tesema.

O le Manu Samoa na faiaina i le la taaloga quarterfinal ma Aferika 19-24, ma o se taaloga finau tele e ui ina tele faaiuga sese a le laufali ao faagasolo ai. Na maea lea taaloga ona taaalo lea o Samoa ma Farani e sue ai le tulaga lima lea na manumalo aio Farani.

Na taua e Muliaga i se faatalatalanoaga i nai vaiaso ua tuanai, o lona talitonuga e mafai e lana au ona ausia se tulaga maualuaga i taaloga o le Olimipeka lea o le a faia i Pare Farani i le masina o Iulai 2024.

Na ia taua e maualuga le faatinoga e nei alo ma fanau o le taaloga, ma e na te talitonu foi e oo mai le Olimipeka ua lava tapena lana au mo lea faamoemoe.

O le taamilosaga o loo faagasolo i le taimi nei e taua tele ona o au e fa pito i luga i le uma ai o lea taamilosaga o le a otomeki ona saofaga atu i le Olimipeka.

O pulu mo le vae i le faaiuga o le vaiaso nei ua tuufaatasia ai Aferika i Saute, Fiti, Farani,  ma Kanata i le Pulu A. I le Pulu B,ua iai Samoa, Aialani, Urukuai, ma Iapani. O le Pulu C, o Niu Sila, Argentina, Kenya ma Sepania. Ao le Pulu D ua iai Amerika, Ausetalia, Peretania ma Uganda.