Ausia E Le Au Siisii A Samoa Ni Matatia Mo Le Atu Pasifika

Don Opeloge

Ata Pueina: Samoa Weightlifting

E toalua ni alo o Samoa ua ausia nei nisi o matatia i le tauvaga siisii uamea mamafa ua ta'ua o le National Championships o loo faatautaia i totonu o Niu Sila i Mt Maunganui.

O le alii ia Don Opelogelea lea sa manumalo i le pine auro mai i Taaloga o le Taupulega (Commonweealth Games) i nai masina ua tuanai, na ia ausia le tolu mtaia fou i le vaega o le 96 kilokalama a alii.

Na sii e Don le 102kilo i le si'i malele (snatch), ae 207 kilo i le sii taofi (clean and jerk), a tuu faatasia e 367kilo. 

O le tamaitai ia Feagaiga Stowers lea na manumalo i le pine siliva mai taaloga o le taupulega na ausia foi se matatia fou ina ua ona sii taofi le 158kilo.

O se tasi foi o sui mai i le au siisii a Samoa, le alii ia John Tafi, na manumalo i le tauvaga mo i latou e i lalo o le 73kilo le mamafa, ma sa ia mafai foi ona ausia se matatia ina ua ia sii maleleina le 130kilo.

Feagaiga Stowers

Ata Pueina: Samoa Weightlifting

I le vaega o alii e i lalo o le 89kilo, na manumalo ai foi se tasi o sui o le au a Samoa ia Tovio Ah Chong, lea na manumalo ina ua ona siia le 144kilokalama i le sii taofi.

O le tamaitai ia Avatu opeloge na manumalo i le tauvaga mo le 76kilo, ae tulaga lua ai Faustina Opeloge le e nao le 16 tausaga le matua. 

O le tamaitai ia Imosina Pelenato lea e na o le 15 tausaga le matua, na manumalo i le tauvaga mo i latou e i le 87kilo, ao Lesila Fiapule na manumalo i le 87kilo.

Na saunoa mai le faiaoga o le au a Samoa, Tuaopepe Jerry Wallwork, o se tulaga mataina tele le taumafaiga a le au siisii a le atunuu i lea faamoemoe o lo'o auai atu iai. 

O le tamaitai ia Olivia Selemaia na sola ma le tulaga muamua o le vaega e i lalo o le 64kilo. O lea alo o le atunuu e mai i Niu Sila ma e oo atu i le 100 matatia a Niu Sila na ausia e lea tamaitai.