MANUMALO VAELA'A ILOA TAUVAGA SIVA AFI 2022

Vaelaa Iloa

Ata Pueina : Eyespy Radio

Manumalo le alii ia Vaelaa Iloa mai le afio'aga o Matautu i le Siva
Afi 2022 ma le tino i tupe e $20,000. Mai le olaga fa'atau 'ula-lei i
le siamupini o le Siva-Afi.

I le 12 o tausaga o le alii ia Vaela'a Iloa sa ia fa'atauina ai ni
"ula lei" oloa i le mamalu lautele (street vendor) e fesoasoani ai mo
si ona aiga. Peita'i i se la feiloaiga ma le ali'i ma le afioga ia
Leota Lene Leota i ni tausaga ua mavae na avea ma se suiga tele i lona
olaga.

Sa iai le ali'i ia Vaela'a mo'omo'oga o le fia auai i le Siva Afi a'o
laititi ma i taimi sa fa'atau ai ona ula , ae ina ua feloa'i ma le
alii pule ia Leota Lene ma fesiligia ai pe fia auai mo lenei
fa'agatama sa ioe le alii ia Vaela'a. O lea lava taimi na amata ai
savaliga o le ola siva afi o lenei alii seia o'o mai i le taimi nei.

I le taimi ao itiiti le alii ia Vaela'a sa tauva ai o ia i nisi o
tauvaga Siva Afi o tausaga ua tuana'i , ae sa fa'aigoa e tagata ia
"Ula Boy". Sa tele ni fa'afitauli na feagai ma le alii ia Vaela'a , ae
e le'i avea ma se mea e fa'ato'ilalo ai lona tagata taumafai. I le
tauvaga muamua sa ia auai ai na fa'apea na le manuia ona taumafaiga,
ae o le o lona auai ai leisi tausaga na amata ai loa lona sami malo i
le tele o tausaga.

Sa fa'ailoa fo'i le alii ia Vaela'a lona talisapaia o le agalelei o
Leota Lene Leota mo lona aumaia o ia totonu o le olaga o fa'afiafiaga.
Sa fa'ailoa mai e le alii ia Vaela'a ana le seunoa le la mafutaga ma
le fesoasoani o Le Atua na te le ausia nei mea uma.

Sa va'aia le fiafia tele o lenei tama fanau ina ua valaauina lona
suafa ma tagata manumalo o le tausaga 2022. E to'atele uo , aiga ma e
masani o le alii ia Vaelaa na auai ma tapua'i lona taumafaiga lenei
tauvaga.

E lua po sa fa'atautaia ai le tauvaga , ae o le po le Aso To'onai lea
sa mavae atu na faia ai le tauvaga tele mo lenei tausaga. E to'alima i
latou sa finau ina ia latou mauaina le tulaga muamua. Ae peita'i ua
sola le alii ia Vaela'a Iloa ma le manumalo o lenei tausaga.

Sa vaevaeina le tauvaga i ni vaega e lua o le (singles) lea e faapea
ona tasi le ailao afi , ma le (doubles) lea e lua ailao afi e
fa'aogaina. Sa fa'atumulia tua le fale o le malo i le to'atele o aiga
ma uo o le au sui tauva e tapua'i ma maimoa i taumafaiga o latou
fanau.