'AUSIA E LE MANU SAMOA LE TULAGA 10 I LE FA'ATULAGAINA O 'AU LAKAPI A LE LALOLAGI

Manu Samoa (Ata pueaina: Lakapi Samoa)

Ua se'e atu nei le Manu Samoa 15 i le tulaga 10 i le fa'atulagaga o 'au lakapi taitoasefulumalelima a le lalolagi ina ua manumalo i lana ulua'i ta'aloga o le ta'amilosaga o le Ipu o le Pasefika (Pacific Nations Cup) ma Iapani, na fa'atautaia i le po o le Aso To'ona'i o le vaiaso ua tuana'i atu i le malae ta'alo o le Sapporo Dome i Iapani.

Na manumalo le 'au a le atunu'u ia Iapani i 'ai e 24 - 22, ma o se ta'aloga finau tele e ui na ta'aalo toasefulumalefa Iapani mo le aotelega o lea ta'aloga ina ua pepa mumu (red card) le latou numera 8 ia Michael Leitch ona o se pu'e leaga na ia fa'atinoina.

Na muamua tau 'ai o Iapani ina ua sikoa Amato Fakatava i le minute lona 6 o le afa muamua o le ta'aloga, ma sa manuia le taumafaiga a le fesi a Iapani ia Seungsin Lee agai i le pou mo se 'ai fa'aopoopo ma maua ai loa 'ai e 7 a Iapani i le 0 a le Manu Samoa. 

Na toe maua 'ai e 3 fa'aopoopo a Iapani mai i se sala agai i le pou a le ali'i o Lee ina ua faasala le Manu ma o'o atu ai 'ai, Iapani 10 - 3 Manu Samoa.

Peitai e le'i fa'avaivai ai le Manu ina ua laasia e le ali'i o Alamanda Motuga le laina sikoa a Iapani, ma na manuia fo'i le taumafaiga a Christian Lealiifano agai i le pou ma fa'amauina ai 'ai o le ta'aloga, Iapani 10 - 07 Manu Samoa. 

Na toe maua isi 'ai e tolu fa'aopoopo a le Manu mai i se sala ma tutusa ai loa ai o le ta'aloga i le mae'a ai o le afa muamua, Iapani 10 - 10 Manu Samoa.

O le sikoa lona lua a le Manu na maua mai ia Jonathan Taumateine i le minute amata o le afa lona lua. 

E ui na ta'aalo le atoa Iapani ina ua tuli i tua Michael Leitch, ae o le laki o le lelei o le kiki agai i le pou a le ali'i o Seungsin Lee na pipi'i ai 'ai o le ta'aloga.

Ae na toe sikoa Tumua Manu mo Samoa i le minute lona 61 o le ta'aloga ma fa'amauina ai loa 'ai fa'ai'u, Manu Samoa 24 - 22 Iapani.

O le fa'ato'a toe maua lea o se manumalo a le Manu Samoa ia Iapani i totonu o laufanua o Iapani talu mai le tausaga e 2012.

O Samoa sa i le tulaga 12 a'o le'i ta'aalo ai ma Iapani.