SAUNI TUPUOLA ATO FAOAGALI E FETO'AI MA LE PULU FANA MAI I FITI

Ato fa’atasi ai ma le ali’i o Apisai Naciqa ma nisi o sui o le kalapu a Malisi ma le Pulega o le S.T.A i le taeao analeila.

Ata Pueina: Lars Gustaf Bell/ Eyespy Radio Samoa

O le fa'ai'uga o le vaiaso nei o le a iloilo ai se tasi o alo fusu o le atunu'u ia Tupuola Ato Faoagali ma le ali'i fusu mai i Fiti ua fa'aigoaina o le pulu fana ia Isikeli "The Fijian Bullet" Senidoko.

O lea faipelega o le a fa'atautaia i le Fale Ta'alo 1/Gym 1 i Tuanaimato i le Aso Faraile 23 o Iuni.

O le Aso 22 o Novema o le tausaga na te'a nei na manumalo ai Tupuola i lana ulua'i fusuaga fa'apolofesa ma le isi fo'i ali'i fusu mai i Fiti ia Apisai Naciqa.

Na saunoa mai Tupuola ua ia sauni mo le la ta'aloga o lo'o loma nei ma lea al'ii Fiti, ma e ui ua leva ona fusu faapolofesa Senidoko, ae e le'o fa'apopoleina o ia i lea tulaga ona o lo'o ia talitonu ua ia lava tapena mo lea fa'amoemoe.

"Ua leva ona ou sauni mo lea fusuaga. ma ou te iloa o Senidoko e tele lona experience, ae ua leva fo'i ona 'ou fusu i le level o le amateur," o lana saunoaga lea.

Na ta'ua e le tua'a o Tupuola ia Steven Faogali o lana faiaoga foi lea, "Na matou manana'o i se fusuaga ma le ali'i mai Aferika o Joseph Kwadjo lea na malolo ai Senidoko talu ai i le la fusuaga e ala i le T.K.O."

"Peitai, e le'i mana'o Kwadjo e fufusu ma Ato, ae na o Senidoko na fa'ailoa mai e fia iloilo ma Ato," o le saunoaga lea a le ali'i faiaoga.