GAOIA LE FALEOLOA O LE BLUEBIRD LUMBER & HARDWARE STORE I SALEUFI

Bluebird Lumber & Hardware

Ata Pueina: Bethel Peato/ Eyespy Radio Samoa

O lo'o fa'agāsolo nei su'esu'ega a le Matāgaluega o Leoleo i le gāoia ai lea o le lālā o le fale'oloa o le Bluebird Lumber & Hardware Store i Saleufi i le amataga o le vaiaso nei.

Na tā'ua e le pa'aga a le leitio o le Eyespy e le'i fia fa'ailoa lona suafa, o le po o le Aso Sa na te'a nei a malama le vaveao o le Aso Gafua, na tula'i mai ai lea mataupu.

Sa ta'ua e nisi o le mamalu o le atunu'u na aga'i atu mo fa'atauga i le Bluebird i Saleufi i le aso ananafi (Aso Gafua 19 o Iuni), na tapunia le faleoloa i le taeao atoa, ae fa'ato'a tatala i le ta o le itula e 12 i le aoauli.

Na ta'ua e le pa'aga a le leitio nei fa'apea ai ma nisi o le aufaigaluega, o le tuai ona tatala ai o le Bluebird i le aso ananafi, ona ua gaoia.

E fa'apea o lo'o maua i ata pu'e po'o surveillance footages mai i security cameras a le faleoloa, se ali'i o lo'o la'eiina se ofu o lo'o tusia ai le igoa o le kamupani ae o lo'o sai ona foliga i se mitiafu.

O le faamalama 'ea/ventillation o le faleoloa na oso atu ai lea alii ma ia faatino loa le aveeseina o nisi o meatotino e ola i le uila, fa'apea ai ma le pusa o lo'o iai seleni fo'ai po'o le donation box, atoa ai ma nisi o oloa.