FAITIOINA E TAGATA SAMOA LE TAMAITAI NA FA'ASEA I LE AUFAIGALUEGA A LE FALEAIGA O LE BURGER BILL

Ata Pueaina: Tiktok

Ua fa'aalia i luga o upega tafailagi le tele o faitioga a le toatele o tagata Samoa aga'i i se tama'ita'i Samoa mai i Niu Sila o loo fa'asea ma lafo ni fa'aupuga i se tasi o sui o le aufaigaluega o le faleaiga a le Burger Bill ona o le tuai ona maua o lana meatausami sa oka mai i lea faleaiga. 

O se video na pue'ina e le mamalu o le atunu'u ma tu'u i luga o le Tik-Tok fa'apea le Facebook, o lo'o vaaia ai le le fiafia o lea tama'ita'i talavou i le sui o le aufaigaleuga a le Burger Bill sa tu'uina atu ia te ia lana oka.

E silia ma le minute o fa'asea lea tama'ita'i ma i'u ai lava ina ona togi le sui o le faleaiga i lana meainu sa ia u'uina.

Na ia oso loa i fafo o lana ta'avale ma ia toe fai iai ni fa'aupuga e fa'apea "Sa tatau ona outou fa'ailoa mai ia i matou e umi le taimi e fa'atali ai mo le oka. E fa'aletonu tele le tou auaunaga!".

Sa taumafai le sui o le aufaigaluega e faamaualalo ma fa'amalie lea tama'ita'i ae na atili ai ona ita o ia ma fa'apea o le a ia alu atu i totonu o le faleaiga e fa'aali ai lona le malie.

Peita'i, na taofia o ia e se tasi o mafine i luma o le faitotoa o le faleaiga ma fai i lea tamaitai talavou e le o aga po'o tu ia a se tagata Samoa aoaoina. 

Na te'i ai lea ua sui le leo a lea tama'ita'i talavou ma fa'apea ane e 30 minute o ia fa'atali ma lona toalua ma le la tama mo le latou oka.

Ae tali mai le mafine, "E leo le auala na Faasamoa, e nao fafo i la atunuu e te faia ai na uiga."