'Ausia E Le Toa Samoa Ni Matati'a Mai I Le Ipu O Le Lalolagi

Ata Pueina: R.L.W.C

E ui e le'i manumalo le Toa Samoa i le la su'egasiamupini ma le 'au a Ausetalia i le Aso Sa ua tuana'i, ae sa mafai ona 'ausia e le 'au a le atunu'u nisi o matati'a, ma tusia ai Samoa i le tala fa'asolopito o le lalolagi, a'o 'auai atu ai i le taa'milosaga o le Ipu o le Lalolagi mo le Lakapi Liki 2022.

Na maoa'e le taumafaiga a le tatou Toa Samoa ina ua 'avea ma atunu'u muamua mai i le Pasefika i Saute e saofaga atu i le su'egasiamupini o lea taamilosaga, ma o se atunu'u muamua mai i atunu'u tulaga lua (tier two) ua ausia lea matati'a. E le gata fo'i i lea, o Samoa e lona ono iai atunu'u fou ua mafai ona sao atu i le su'egasiamupini o le Ipu o le Lalolagi.

O Samoa fo'i le 'au e sili ona laiti tausaga o a latou tama ta'aalo sa auai i lea fa'amoemoe, o le to'atele o sui o le Toa Samoa e i lalo ifo o le 25 tausaga le matutua, e pei o le ali'i fulupeki ia Joseph Suaali'i lea e na o le 19 tausaga le matua o lona soifua.

Sa mafai fo'i e le Toa Samoa ona fa'aseseina le mate a le to'atele o tagata o le lalolagi, ina ua manumalo i le 'au malosi a le Mate Ma'a Toga 20-18, ma le 'au a Egelani e 27-26 e ui e le'i mafaufauina e le toatele o le a mafai ona manumalo Samoa i ia ta'aloga e lua.

O lea ta'aloga semifinal i le va o le Toa Samoama Egelani, sa palotaina fo'i e le 'au maimoa, o le ta'aloga aupito mata'ina ma le numera tasi lea ole ta'amilosaga.

O le Toa Samoa fo'i o le 'au lea sa silisili ona fia maimoa iai le lalolagi, lea e ova ma le tasi 1.1miliona le aofaiga o tagata sa matamata i ta'aloga uma a le Toa Samoa a'o fa'agasolo ai le Ipu o le Lalolagi.

Na o le pau le tulaga fa'anoanoa sa gapatia ai Samoa ma i lana taumafaiga i le ta'amilosaga, o le fa'amanu'alia ai lea o a latou tama ta'aalo e to'avalu.