Fa'asea Se Aiga I Lalomanu Ona O Ni Ata Na Pu'eina E Turisi

Ni turisi fai Tik-Tok

Ata Puein : Tik-Tok

Ua fa'aalia le le fiafia o le aiga lea e onaina se faletalimalo e tu i le afioaga o Lalolamanu, ina ua pueina ni ata o tu'ugamau a nisi o sui o le latou aiga ua faiilagi le folauga e ni turisi. O nei ata poo lea video na pueina e nei papalagi sa tuuina i luga o upega tafailagi poo le Tik-Tok i nai vaiaso ua tuana'i.

Na taua i totonu o lea video e nei turisi le aganu'u a tagata Samoa, o le tanu lea o tino o tagata ua maliliu i luma o maota ma laoa.

Na taua e se sui o le aiga e onaina le faletalimalo ia Pouvi Aulaumea-Fuimaono, ua fai lava si le migao ma le le mafaufau o nei tagata maimoa mai fafo ma ia uiga sa laua faia. "O le toalua lea na pueina le ata lea o tuugamau o nisi o nai o matou aiga, sa laua pueina e aunoa ma se faatagana. Sa laua solia foi le fanua e aunoa ma se logo mai o se isi o le matou aiga, ma ua tiga ai lava le loto ona o lea mea ua tupu mai,"

Na saunoa foi Pouvi, ua matua faanoanoa lona aiga ona o lenei video sa pu'e e papalagi nei. "O le video lea sa matou matamata atu ai i luga o le Tik-Tok, ua ova ma le 500,.000 tagata mai soo se tafa o le lalolagi ua matamata iai. Ua na o le lagona o le toatama'i ua o'o mai ona o le le iai o se manatu o nei turisi i aafiaga o si o maou aiga ona o lea aga sa laua faia,"

"E tatau i le Malo o Samoa ona faia se fuafuaga e puipuia mai ai si o tatou aganu'u mai i le aveseseina e tagata e pei o turisi nei. E tatau foi i turisi ona talanoa pe faafesootai muamua le e ona le faletalimalo ae lee pueina neiituaiga video e faaseseina ai tagata.

Na te'ena e le Ofisa o Tagata Maimoa mai Fafo ni tu'uaiga e faapea o le Ofisa sa fa'aosoosoina nei turisi e tapu'e mai nei video, ma na taua foi e le Ofisa e leo iai se afaina o atinae tau turisi mai i lea video sa pu'eina.