Manumalo Pe Malolo, E Sili A Le Toa Samoa

Toa Samoa

Ata Pueina: R.L.W.C

O lo'o tumau pea le lagolago o tagata Samoa mo le Toa Samoa, e ui ina le tau lau o le faamoemoe i le fia avea lea ma atunu'u muamua mai i le Pasefika i Saute e sola ma le siamupini o le Lakapi Liki.

'Ae e ui e le'i manuia taumafaiga a la tatou 'au o le Toa Samoa i le la ta'aloga ma le 'au a Ausetalia i le Aso Sa ua mavae, o lo'o tumau pea le fiafia ma le mitamita o tagata Samoa i le tulaga maualuga sa o'o iai le 'au a le atunu'u i le Ipu ole Lalolagi mo le Lakapi Liki i lenei tausaga.

A'o fa'agasolo ai le matamataga a le mamalu o le atunu'u i le ta'aloga lea sa auina tu'usa'o mai i luga o le televise tele a le Apia Park i le aso ananafi (Aso Sa), sa maua le avanoa e faatalatalanoa ai foi e lau Eye-Spy Radio le mamalu lautele e uiga i so latou lagona pe afai e faia'ina le Toa, pe e ono suia ai lo latou lagolago i le 'au?

Sa ta'ua e se tasi o tama mai i le afioaga o Matautu e suafa ia Ete Kalolo ina ua mae'a ai le ta'aloga ananafi, e ui na malolo le Toa Samoa, ae o lo'o ia lagolago pea i le 'au ona o le fa'aeaea atunu'u lea ua o'o ai lava ina tusia ai le igoa o Samoa i totonu o le tala fa'asolopito o le Lakapi Liki, ina ua avea ma atunu'u muamua mai i au lona lua (tier two nations) o le lalolagi e saofaga atu i le suegasiamupini o le Ipu o le Lalolagi.

"Malo le finau malo le tauivi Toa, malo le lotonu'u. Ua outou si'i Samoa i luga o le ma'asalafa, fa'afetai le fa'aeaea atunu'u," ta'ua e Kalolo.

Na saunoa fo'i le tina ia Fenumia'i Su'a ina ua fesiligia po'o le a sona manatu pe afai e faia'ina le 'au, na ia tali tusa pe malolo e sili pea le Toa Samoa i lona loto. "E le o se tulaga fa'atauva'a le o'o ai lea o Samoa i le final o le Ipu o le Lalolagi. O le ala lea ua fiafia uma ai tagatanu'u o Samoa ona o le mata'ina o le finau ma le lototoa o nei alo o Samoa sa o latou tau le taua."

I se tasi o fa'asalalauga mai i le Peresetene o le Iuni Lakapi Liki a Samoa, Tagaloa Fa'afouina Su'a, na ia fa'afetaia ai le tapua'ia o le alofaiva o tama fanau e le atunu'u. se lagona fa'agae'etia o Tagaloa ona mai lava i le amataga o taumafaiga a le aulakapi a le atunuu, e ui na malolo le Toa Samoa i le ta'aloga muamua ma Egelani, ae o se toilalo na vavane ai i fafo le lotonu'u o ia alo ma tamafanau, ma toe timata ai le upega ia latou taaloga na soso'o ai, se'ia oo lava ina sao atu i le final.

O le tatalo a le toatele o i latou sa fa'atalatalanoa i le aso ananafi, ia tatau lea i le Malo o Samoa ona auina mai nei alo ma fanau i o tatou laufanua ina ia sami ai le maualuga sa iai le latou taumafaiga.