Fa'ate'ia Le Lalolagi Ile Faiaina Ai O Joyce Ia Zhang

Joe Joyce ma Zhilei "Big Bang" Zhang

Ata Pueina: WBO

Ua fa'ate'ia nei le lalolagi atoa i le faia'ina ai o le siamupini le tumau (interim) o le WBO ia Joe Joyce, ina ua fasi fa'amo'amo'a e le alii fusu mai i Saina ia Zhilei "Big Bang" Zhang ma seia lea fusi.

 E le'i mafai e Joyce ona fa'aauau le laua faipelega ma Zhang ina ua taofi e le alii laufali ia Howard Foster le fusuaga i le taamilosaga lona 6, ona o le ogaoga tele o le manu'a sa i le mata taumatau a le alii o Joyce na lavea ona o le masasau o tu'i a Zhang.

A'o le'i fa'atautaia le fusuaga, o le toatele sa talitonu o se paga faigofie tele mo Joyce le alii o Zhang. Peitai na fa'ate'ia e Zhang le lalolagi ina ua ia fa'ato'ato'a lelei ona fasi le alii o Joyce mai i le taamilosaga muamua se ia oo ina taofia le fusuaga i le taamilosaga lona ono.

Na ta'ua e Joyce ina ua mae'a le fusuaga, "Sa faigata ia te au Zhang ona o ia o le southpaw (aga tauagavale), oute le masani i lea ituaiga fusu.

"Ae e le o le i'uga lea mo a'u," saunoaga le a le alii o Joyce.

O Joe Joyce lea sa to'ilalo iai le sa avea muamua ma siamupini o le lalolagi a le WBO ia Lupesoliai  Joseph Parker i le tu'i oti i le tausaga ua mavae.