Silia Ma Le To'a 10 Pagota Ua Magalo I Le Palola

Court House Mulinuu

Photo: Eyespy Radio 87.5 FM

Ua faamaonia mai e le komesina o leoleo le afioga Auapaau Logoitino Filipo, e silia ma le to’a 10 pagota ua tatala i tua i le palola.

I le mae’a ai o iloiloga a le Komiti o le Palola i le vaiaso na te’a nei, e sefulufa (14) pagota ua tatala i tua i le palola.

Na faamaonia e Auapaau Logoitino Filipo i se faatalatalanoaga ma le leitio a le Eyespye i le Aso Gafua o le vaiaso nei faapea, e 47 talosaga mo palola i le aofaiga atoa, ae na o le 14 o i latou e aofia ai ma le tasi o se tamaitai na talia talosaga.

O i latou uma ua agavaa mo le palola ua faamaonia le faia lea o solitulafono eseese e pei o le talepe fale ma le gaoi, fasioti tagata paivalea, fasioti tagata fuafuaina. Ma na taua foi e Auapaau, o i latou uma nei ua maea ona tuli le silia ma le afa o a latou faasalaga faafalepuipui.

O le Ofisa Sili o le Matagaluega o Faamasinoga ma le Pulega o Faamasinoga, o le Komesina o Leoleo ma Falepuipui, o le Loia Sili, o se sui tamaitai, ma se faafeagaiga e aofia i totonu o le Komiti o le Palola lea e nafa ma le iloiloina o talosaga mo le palola.

O le Faamasino o le Faamasinoga Maualuga o Niava Mata Tuatagaloa o loo avea ma taitaifono o le Komiti Faafoe.