Lu'i e Dillian Whyte Le Alii Fusu Saina O Zhilei Zhang
Dillian Whyte
Ata Pueina: Daily Express
Ina ua manumalo ia Joe Joyce i le po o le Aso Toonai na tea nei i Lonetona, na avea ai Zhilei Zhang ma siamupini le tumau o le WBO i le paga mamafa.
Ua faaalia e se tasi o alii fusu mai i Peretania ia Dillian Whyte lea na faiaina ai foi le alii fusu mai i Samoa ia Lupesoliai Joseph Parker, ua ia sauni e "faatumu le avanoa" ma lu'iina Zhang mo le fusi le tumau (interim belt) o le WBO i le aupaga mamafa lea na se'i mai e Zhang mai ia Joyce i le Aso Toonai ua mavae atu.
O Whyte na matamata i le fusuaga a Joyce ma Zhang lea na faatautaia i le fale matamata o le Copper Box Arena i totonu o Peretania ma le faʻamoemoe e fetaui ma Joyce (15-1, 14 tu'i oti), peitaʻi na faʻatoʻilaloina e Zhang le alii o Joyce (25-1-1, 20 tu'i oti) i le taamilosaga lona ono ina ua le mafai e Joyce ona faaauau le fusuaga ona o le afaina tele o lona mata taumatau i tu'i a "Big Bang" Zhang.
Talu ai ua faiana Joyce i le alii fusu mai i Saina, o Whyte (28-3, 19 tu'i oti), ua liliu atu lona mafaufau ia Zhang. O Anthony Joshua na ia faailoa e faapea e na te le toe fusu seia oo ia Tesema, ma o le ala lea o le tuai ai ona toe fetaui (rematch) ai o Joshua ma Whyte.
Afai e mafai e Whyte ona faato'ilalo Zhang, o le a mafai ai loa e Whyte ona lu'iina le siamupini o le IBF/WBA/WBO ia Oleksandr Usyk. “Ua ou le fiafia ona sa ou manao i se fusuaga ma Joe [Joyce], ae peitai e ui i le maasiasi o le tulaga na oo iai Joyce, e le o avea lea ma itu ou te popole i ai,” o le tala lea a Dillian Whyte i se faatalatalanoaga ma le iFL TV.
"Sa toʻa o ia i le taimi atoa o le fusuaga," o le tala lea a Whyte ina ua fesiligia pe o le a sona manatu i le faatinoga e Zhang o le laua faipelega ma Joyce. "Na ia iloa e tatau ona toʻa ona e le mafai ona ia fusu i le saoasaoa e fusu ai Joe.
“O ai lava e mana’o ma te fetaui ua ou sauni i ai mo soo se tasi e fia fusu," o le tala lea a Dillian ina ua taʻu atu e tatau ona ia faanatinati ma faʻalauiloa ni isi o ana fusuaga o loo fuafua.