"Molia Se Alii Samoa I Lona Faamalosi Teine I Totonu Ausetalia"

Ata Pueina: Australian Federal Police / Facebook

Ua molia nei se alii Samoa e 25 tausaga le matua ,ona o ni sauaga tau feusuaiga ma le faamalosi sa ia taumafai e faatino i se tama'ita'i e 20 tausaga i totonu o Springfield i Ausetalia.

O lenei alii Samoa sa lipotia mai e faapea sa ia taumafai e faamalosi se tamaitai ma toso i totonu o se pā la'au i le amataga o le masina nei o Aperila. E faapea o lenei alii o lo'o galue i galuega fa'avaitaimi i Ausetalia mo le 4 tausaga tusa ai ma le visa o loo ia fa'aaogaina. 

E faapea taulumaga o le faamasinoga ana le seanoa le fesoasoani o nisi o tagata sa latalata ane i le nofoaga ,semanu e taunuu i se tulaga leaga lenei tamaita'i na fa'amalosia. 

Sa lipotia e le au faasalalau a le 7News e faapea o le Aso Lulu o le vaiaso na te'a nei na lokaina ai le alii Samoa e leoleo , lea na tula'i ai loa i luga o le faamasinoga i Ipswich i Queensland Ausetalia. E le'i mafai ona fa'asalalauina le suafa o lenei alii ma lē na sauāina e tusa ai ma faatonuga mai le faamasinoga ma le tulafono.

Na talia e le faamasinoga se tusi talosaga a lenei alii Samoa ina ia tatalaina o ia i tua (application for bail) ao talia ana faamasinoga.O lo'o nofo vaavaaia nei o ia ma ua saisaitia foi i lalo o le tulafono o le faamasinoga ina ia saini faatolu i le ofisa leoleo i vaiaso taitasi. 

O nisi o aiaiga e tatau ona mulimulita'i ia aua nei ia tu'ua le fale i taimi faatapulaa mai le 6pm i le afiafi i le 3am. Ua faasaina fo'i ona ia toe tagofia pe taumafa se 'ava malosi. O le masina o Iuni o lo'o fuafua e toe tula'i ai o ia ina ia tali atu i ana moliaga mai le faamasinoga.