Foai E Ausetalia Se Va'atau $30 Miliona Mo Samoa

O le amataga o le tausaga fou 2024 ua fuafua e taunuu mai ai i Samoa nei le va'a o le Nafanua III aua le puipuiina lea o ogasami a si o tatou atunuu.

O lea vaa fou o le Nafanua III o se va'a o le ituaiga o le Guardian-class, ma o le a sui tulaga i le Nafanua II o se va'a fo'i na foa'iina e le Malo o Ausetalia i lalo o le polokalame ua faaigoaina o le Pacific Maritime Security Program. 

O le Nafanua II na faaleagaina ina ua pa'ulia i le tausaga e 2021, ma o le mafuaaga tonu lea ua ala ai ona fa'ameaalofa mai ai e Ausetalia le va'a fou o le Nafanua III mo Samoa.

Na faamaonia mai e le Sui Komesina o le Matagaluega o Leoleo ia Papalii Monalisa Tiai-Keti i se faatalatalanoaga ma le leitio a le Eyespy o le tausaga fou o le a taunuu mai ai lea vaa i Samoa nei.

Ua mae'a foi ona filifilia se auvaa e malaga atu ia Setema mo aoaoga e faatatau i galuega i luga o le va'a ae e lei toe folau atu le vaa i Samoa.

Na taua e le Sui Komesina, o le toe maua ai o se vaa leoleo e taua tele mo i le puipuiga o ogasami a le atunuu faapea ai ma le Sone Faatapulaa o le Tamaoaiga a Samoa poo le Exclusive Economic Zone (EEZ).

"E na o le pau lea o le vaa o le a nafa atoa ma le faamalosia o tulafono ma le puipuiga o ogasami, faapea ma le aoina mai o faamatalaga," saunoa Papalii. 

O le Nafanua III o le a nafa ma le mataituina ma le iloiloina o mataupu tau faigafaiva i ogasami o Samoa faapea ai le puipuia lea o punaoa e maua i le sami, o le laveaia lea o i latou ua puapuagatia i luga o le vasa, ma le fesoasoani lea i taimi o mala faalenatura.

E tusa ai ma le faamatalaga a Papali'i, o le Nafanua III e $30 miliona (SAT) ma o loo taula i le taimi nei i le Austal Shipyard i Henderson iAusetalia i Sisifo lea na fausia ai.