Molia Se Alii Samoa I Lona Ave Faagaoi O Ni Oloa E Tusa Ma Le Afa Miliona Lona Tau Aofa'i

Ata Pueina : The Daily Telegraph

Ua molia nei se alii 37 tausaga le matua e suafa ia Shanel Tofaeono o
lo'o aumau i Ausetalia i lona ave faagaoi lea o ni oloa e tusa ma le
afa miliona lona tau aufa'i faapea ma le taumafai e fao'o le oti i ni
tagata aufaigaluega se to'alua e fa'aaogaina ai se agaese.

 Sa faatinoina se osofa'iga a ni leoleo se toa'avalu ina ia pu'eina
mai lenei alii e tali i ona moliaga.E tusa ma le 3 masina talu ona
faatino le soligatulafono a Shanel Tofaeono ma nisi alii e to'atolu ae
faatoa maua e ofisa leoleo lona nofoaga na lafi ai. I ni lipoti mai le
Ofisa Faasalalau i Ausetalia o le 7news e faapea o loo tausailia pea
leisi to'alua lea na o faatasi ma le alii ia Shanel.

E le'o le taimi muamua lenei ua faia ai e Shanel se solitulafono tele
faapea , i le tausaga e 2020 na faapea ona faia ai fo'i se isi
osofa'iga faagaoi i se tasi o faleoloa. Sa faalia e nisi o vitio a lea
faleoloa le osofaiga a Shanel ma nisi alii se to'alua, lea na talepe
ai tioata ma sefe na iai totonu filifili auro , taimane , mama
faaipoipo ma nisi oloa anagata sa o latou gaoia i lalo o le 3 minute.

O loo nofo taofia nei le alii ia Shanel i le ofisa leoleo i Granville
Ausetalia e faatali i ni ona moliaga ma o loo faagasolo pea suesuega a
leoleo mo leisi to'alua lea na o latou faatasi ma Shanel. O le masina
o Iuni o le tausaga nei o loo fuafua e tula'i ai le alii ia Shanel
Tofaeono i luma o le faamasinoga e tali i ona moliaga.