Phil Gould :"Ua Tatau Ona Faate'a Ese Suaali'i Mai I Le NRL."

Ata Pueina: Getty Images

O le konekarate e $5 miliona na sainia e se tasi o sui o le Toa Samoa ia Joseph Suaalii ina ia taalo ai mo le au a le Wallabies ua ita tele iai le Pule Sili o le Canterbury-Bankstown Bulldogs, Phil Gould, lea na talosaga i le NRL ua tatau ona faate’a ese loa Suaali'i mai i le taamilosaga.

Na una’ia e Phil Gould le NRL ina ia motusia so’otaga ma le alii lakapi liki Joseph Suaalii i le mae’a ai o lana maliliega tele e auai i le lakapi i le 2025 ma taalo ai mo le Wallabies.

Ua sainia e Suaalii se konokarate ma le NSW Waratahs faapea ma le Lakapi Ausetalia e taalo ai i le lakapi iuni mo le tolu tausaga e silia ma le $5 miliona lona tau.

E toe tasi ma le afa tausaga o loo totoe e taalo ai Suaalii mo le Sydney Roosters, ao lea ua manao e tuliesea loa Suaali'i mai i le taamilosaga o le NRL.

Na taua e Gould i se faatalatalanoaga ma le ofisa faasalalau a le %100 Footy a le Channel 9, "O so'o se taimi lava e sikoa ai Suaali'i pe na te faia foi se gaioiga matautia i se taaloga, o loo talanoaina e tagata lona me'i ai lea i le lakapi iuni,"

"E le mo'omia lea tulaga i lenei taimi i totonu o le taamilosaga, ua tatau ona fafo loa ma le mafala ma faamave loa ma le NRL,"

“Ua fai lana filifiliga. Ou te le o ita i lenei alo talenia ona o se isi tulaga.Na ou fiafia i lana taalo i totonu o le NRL. O ia o se tagata taʻalo mataʻina ma e lelei tele mo le taʻaloga. Ae ua tonu ia te ia e avea ma se tagata taalo lakapi iuni, o lea tofa ia, alu ese loa oe,” o le saunoaga lea a Gould.

Na taua foi e se tasi o alii Kiwi o loo taaalo faatasi ma Suaali'i i le au a le Rooster o Brandon Smith i se fonotaga ma le au tusitala ina ua fesiligia sona manatu i le auai atu ai lea o Suaali'i i le lakapi iuni, "E le faapea o le faatau ai o Suaali'i o le a mafai ai e le Wallabies ona faatoilalo le All Blacks."