Faimalaga Atu Le Manu Samoa 7s Mo Europa

Le au taitoafitu a le Manu Samoa.

Ata Pueina: HSBC

O le fa'ai'uga o le vaiaso ua mavae na tu'ua ai e le au taitoafitu a le Manu Samoa le atunu'u ae faimalaga atu mo Aotearoa ina ia tapena ma sauni ai mo vae e lua mulimuli o le World Sevens Series o le a faatautaia  i Toulouse i Farani ma Lonetona i Peretania.

O le taamilosaga i Toulouse o le a faatautaia i le aso 12 o Me se ia o'o i le aso 14, ona faia ai lea o le vae mulimuli o le Ta'amilosaga Taitoafitu o le Lalolagi i Lonetona mai i le aso 20 - 21 o lenei masina.

E tatau i le Manu Samoa ona sao atu i le suega siamupini mo ipu autu (cup final) o vae e lua o lo'o loma nei aua sona avanoa e sao atu ai i au e toafa pito i luga (top four) o le World Sevens Series. E le gata i lea, o le a maua ai foi le avanoa e auai atu ai le Manu Samoa i le Olimipeka o le tausaga fou lea o le a faia i Farani.

E le'i o'o atu Samoa i Ta'aloga o le Olimipeka talu ai i le tausaga e 2021 lea sa faia i Iapani, ae na faailoa e le alii faiaoga ia Muliagatele Brian Lima o lona naunautaiga o lo'o iai ia maua se avanoa o Samoa i le Olimipeka o le tausaga fou i Farani.

O le taimi nei o lo'o tulaga 6 Samoa i le fa'atulagaina o 'ai o le ta'amilosaga o le World Sevens Series e 111 ona 'ai.

O Samoa o lo'o iai fa'atasi ma Ausetalia, Iapani ma Aialani i le Pulu D o le vae o le a faia i Toulouse i le vaiaso fou.