Mafatia Tagata Samoa I Le Tau Ma Le Leai O Ni Pusa Moa

(Ata Pu'eina: RNZ) Ua fa'asea le to'atele o tagata i le utiuti ai lea o a'ano o moa i faleoloa ma supamaketii Samoa nei.

Ua iloga ona mafatia ni isi o le mamalu o le atunuu, fa'apea ai fo'i ma ni isi o faleoloa ma supamaketi i Samoa nei ona ua silia nei ma le lua vaiaso e le'o maua ni a'ano o moa po'o ni pusa i le atunu'u atoa.

E tusa ai ma fa'amaumauga a le Malo o Samoa, e 60 container po'o pusa o aano o moa na aumai i masina taitasi, a'o le'i o'o mai le fa'ama'i o le Koviti-19 i le amataga o le 2020 lea na matua'i a'afia ai le faa'soasoaina ma le sapalaiina o a'ano o moa mo le lalolagi.

Sa asia e le leitio a le Eyespy Radio ni isi o fale'oloa ma supamaketi i totonu o le taulaga o Apia i le Aso Faraile o le vaiaso nei, ma iloa mai ai e le'i maua lava ni pusa moa po'o ni aano o moa e o'o mai lava i le taimi nei.

Na faamaonia mai e se tasi o tama'itai faigaluega a le supamaketi o le Woolsworth i Vaitele, le atoa ai lea o vaiaso e lua e le'i toe maua lava ni moa.

Sa mafai foi ona maua e le leitio a le Eyespy le avanoa e fa'atalatalanoa ai le so'oupu o le faleoloa si'iatoa a le Frankies Wholesale, lea na ia faapea mai o lo'o talia pea e le latou kamupani se va'a la'uoloa mai i Amerika o lo'o momoli mai ai a latou pusa moa.

Na fa'aalia fo'i e se tasi o tina 39-tausaga-le-matua mai i Vaitele ia Fetu Ausage Faatoina lona le fiafia ai lea ona o le sioki o le pusa moa ua iai nei.

"O si o matou aiga e lima vaivai ma e na o le toatasi le tagata faigaluega o lo'o fa'atauina taumafa a si o matou i lea aso ma lea aso. E na o le moa lava le mea lelei e gafatia ona faatauina ona e taugata le mamoe faapea ai ma pipi (turkey). A'o lea ua le toe maua se moa, ia o le elegi (tin fish) a le tali ona e taugofie," saunoaga lea a Fetu.

E le gata i faleoloa ma supamaketi, ae ua o'o fo'i i ni isi o faleaiga ma fale taumafa e le o maua ai fo'i ni moa.