Galulue Samoa E Lua E Faaleleia Fesootaiga O Femalagaiga O Vaalele

Samoa Airways

Ata Pueina: Google Image

O le unaia o le fa'aleleia atili o feso'ota'iga e faatatau i femalagaiga o va'alele i Amerika Samoa, o lo'o su'esu'eina nei e le pulega o feso'ota'iga a Samoa ma Amerika Samoa ni ta'iala fou ina ia ausia ai lea tulaga.

Na taua e le Ofisa Sili o le Matagaluega o Feso’ota’iga ma Auala Faatekonolosi ia Lefaoalii Unutoa Fonoti o se tasi lea o itu o lo'o mana’omia le silasila toto’a ai lea o le malo o Amerika Samoa ma na laga foi i le taimi o le la fonotaga ma Samoa i Sisifo.

I se fa’atalatalanoaga a Lefaoalii ma le leitio a Eyespy, na ia taua ai e fa’apea o lo'o i ai se nofoaga i Amerika Samoa e tele ina motusia auala o fesootaiga ma le ‘olo i Faleolo faapea ai ma va’alele e taunu’u iai.

Ua fa'amalosia pailate uma ina ia fa'aoga telefoni fe'avea'i i lea nofoaga. Faaalia e Lefaoalii e tusa ma le 15 tausaga o iai lea faafitauli.

O fa'afitauli tau feso'ota'iga e tele ina a'afia i va'alele e tu'ua Samoa pe a ui atu latalata i le mauga o Olotele.

Ua talosagaina e Samoa ia Amerika Samoa ina ia ave le faamuamua i lea mataupu ina ia foia loa i se taimi vave.

Na fa’ailoa foi e le Pulesili, o le vaiaso nei o le a asia ai Samoa e inisinia mai le Ofisa o Feso’ota’iga a Amerika Samoa, pe mafai ona latou saili se auala e foia ai fa’afitauli o le feso’ota’iga a le malo, a’o le’i tu'uina atu le talosaga i le ofisa o feso'otaiga po'o le Federal Communications Commission.

O le Mauga o Olotele sa fautuaina e faatu ai se olo mo fesootaiga. E ui e le’i i ai se fa’alavelave na tula’i mai ona o le fa'aletonu o auala o fesootaiga, ae na fa’amamafaina e Leafaoalii e taua lava le fa’amuamua o le saogalemu o pasese femalagai i luga o peau o le ea.