Sauni Parker E Fetaui Mo Le Fusi O Le Taupulega (Commonwealth Title)

La'auliolemalietoa Joseph Parker

Ua sauni nei le alo fusu o Samoa ia La'auliolemalietoa Joseph Parker e fetaui ma le ali'i fusu mai i Ausetalia ia Faiga "Django" Opelu mo le Fusi o le Taupulega (Commonwealth Title).

O le aso 24 o le masina Me o le tausaga nei o le a faataunu'u ai le la fusuaga i le falematamata o le Margaret Court Arena i Melepone i Ausetalia.

O lea fusuaga o loo loma nei i le va o Parker ma Opelu, o se avanoa mo Parker e na te toe taumafai ai ina ia toe avea o ia ma siamupini o le lalolagi i le aupaga mamafa e pei ona avea ai o ia ma siamupini o le WBO i le tausaga e 2016 ina ua ia manumalo ai ia Andy "The Destroyer" Ruiz.

O le tausaga na te'a nei na faia'ina ai Parker ina ua ia lavea i le tu'ioti a le ali'i o Joe Joyce mai i Peretania. Peitai o le amataga o le tausaga nei i le masina o Ianuari na  manumalo ai Parker ia Jack Massey i ai (unanimous decision).

O Opelu e 15 manumalo-3 faiaina-2 tutusa, ma o se alii ua leva ona fusu ai i totonu o Ausetalia, ma na fufusu ma ni isi iloga i le taaloga o le fusu i Ausetalia e pei o Lucas Browne, Justis Huni, faapea ai ma Kris Terzievski. 

Ua folafola e Parker e le mae'a taamilosaga faatulagaina o le laua fusuaga ma Opelu ona o lo'o ia naunau e manumalo i le tu'ioti. Na ia ta'ua foi ua leva ona ia sauni mo lea faamoemoe i le masina o Me. "O Opelu o se tagata fusu ua leva foi ona fusu i Ausetalia, ma o se avanoa foi lenei mo ia e faaali ai lana taleni. Peitai, e tele sitepu (levels) o le taaloga o le fusu faapolofesa e na te lei o'o iai,ma o le a ou ta'u ia te ia le eseesega i le taimi o le maua faipelega.

"E le'o mama ia te au le fusuaga ma Opelu, ma o le a ou taumafai e fa'afiafia le au matamata e ala i le tu'u atoa iai o lo'u malosi i lea fetauiga," o le saunoaga lea a Parker i se faatalatalanoaga ma le Sporting News. 

O le taimi muamua lenei o le a fusu ai Parker i totonu o laufanua o Ausetalia.