Malemo Se Alii Saina I Alao I Amerika Samoa

Ata Pueina: Supplied

O le aso ananafi na maliu ai se alii Saina o loo nofo i le afioaga o Auasi i Amerika Samoa ina ua malemo o ia i le sami ona na sa'e le va'a sa iai o ia ma ni isi o sui o lona aiga.

O lea faalavelave na tupu i Alao.

O le uo a le alii Saina ua maliu e suafa ia Peter Talavaa na saunoa e faapea o le ta o le 4 agai i le 5 i le afiafi ananafi na vili atu ai le aiga a le ua maliu ia te ia mo se fesosoani i le faalavelave ua tupu. 

Na ia ta'ua e faapea o lana uo Saina na fagota ma lona aiga i luga o le vaa ae ta loa e se galu tele ma pau'lia ai, ma e na te talitonu o le tele toe mamafa o le tino o lana uo na mafua ai ona malemo o ia.

Sa ia saunoa foi, e pe a ma le 20 minute talu ona tupu le faalavelave ae agai atu loa ni isi  o tagata na iai i le matafaga na taumafai e laveai ma faaola lea alii Saina, ae o loo talia pea le taunuu atu o le ofisa leoleo ma le taavale falema'i.

Na faamatala foi e Talavaa e faapea na iai le avanoa e ola ai lana uo pe ana iai se masini fa'ate'i (defibrillator) na o atu ma foma'i.

Sa faaalia foi e Talivaa lona le fiafia i le tali mai o le ofisa o faalvelave tutupu faafuase'i poo le EMS ona o le le lava tapena.

Sa ia tau atu i le KHJ News o le mea na tupu ua toe faaalia ai le manaomia o le aoaoina o tagata faigaluega mo faalavelave faafuasei ma ia faaleleia foi auaunaga a le Matagaluega mo sailiga ma laveai.

O le tagata ua maliu sa i ai sana faleoloa i Auasi ma o lona maliu ai ua mafatia ai llana ava ma si ona afafine e tolu tausaga le matua.