FOA'I E LE MALO O PERETANIA LE $30,000 E FESOASOANI I TAPENAGA MO LE TU'UGA VA'A FA'AVAOMALO A LE LALOLAGI

Amepasa o le Malo o Peretania i Samoa ia Gareth Hoar ma le Peresetene o le S.O.C.A ia To'aigaoaloali'i Matthew Wendt. (Ata Pueaina: Lars Gustaf Bell/ Eyespy Radio Samoa)

E $30,000 tala le aofa'iga o se seleni ua tauaaoina e le Malo o Peretania i le Asosi Alo Va'a Paopao a Samoa po'o le Samoa Outrigger Canoe Association (S.O.C.A), lea o lo'o feagai ma le mataituina o tapenaga uma mo le talimalo ai lea o Samoa i le tu'uga va'a faavaomalo a le lalolagi ua fa'aigoaina o le I.V.F Va'a World Distance Championships i le tausaga nei.

O lea fesoasoani tau seleni na tauaaoina i le mae'a ai ona sainia o le feagaiga e aloaia ai lea fesoasoani e le Amepasa o le Malo o Peretania i Samoa ia Gareth Hoar ma le Peresetene o le S.O.C.A, le afioga ia To'aigaoaloali'i Matthew Wendt.

Na saunoa mai le Peresetene o le S.O.C.A ia To'aigaoaloali'i Matthew Wendt o le $30,000 ua o latou taulimaina, o le a faaogaina e fa'amae'a ai itu uma o lo'o manaomia mo le tu'uga. "E momoli le agaga faafetai i le Afioga i le Amepasa ona o le fesoasoani mai i le fa'amoemoe o lo'o loma nei."

Na ia ta'ua foi o le tu'uga o le I.V.F Va'a World Distance Championships o le a amatalia i le Aso 10 se ia paia le Aso 19 o Aukuso, ae e amata ona taunu'u mai i Samoa nei le au tauva i le vaiaso fou.

"E 29 atunuu o le lalolagi o le a auai i lea fa'amoemoe tele, ma e silia ma le 1000 le au alo o le a tausinio mo le tu'uga," saunoa To'aigaoaloali'i Matthew Wendt.

I le saunoaga a le Amepasa o le Malo o Peretania ia Gareth Hoar, na ia taua ai o le faamoemoe autu o lea fesoasoani seleni o le faafaigofiena ai lea o tapenaga uma mo le tu'uga.

Ae e le gata foi i lea, o le unaia ai lea o le feau ia tausi i o tatou gataifale ma faamama au tupulaga o a taeao ma le lumanai.