TAOFIA E LEOLEO TALAVOU E TOALUA SA OSOFAIA LE FALEOLOA O LE AH YEN STORE I LOTOPA

Ata pueaina: Supplied

O le ta o le 11:50AM i le taeao o le aso ananafi (Aso Lulu 26 Iulai) na osofaia ai e ni ali'i talavou e toalua, o Shawn Peters ma Paul Lolouta le faleoloa o le Ah Yen Store i Lotopa, ma faapea ona la'ua fa'ao'olima ai i le tamaitai o Lei MJ Fonoti o lo'o faigaluega o se cashier/kesia i lea faleoloa.

Na maua le avanoa e faatalatalanoa ai e le Eyespy Radio le uso o le tamaitai kesia na a’afia i le osofaiga a nei ali'i e toalua. O le aso ananafi na maua ma taofia ai lava e Leoleo i la'ua nei na faatinoina lea soligatulafono.

Na saunoa mai le tamaitai o Oka Junior Fonoti (o le uso o le tamaitai sa a'afia) e fa'apea, "Fai mai lou uso sa o atu i la'ua nei faatau ni faguinu lapoa e lua ma ni pepa sikaleti lapoa e lua.

"Ae toe o aumai ni isi faguinu e lua e atoa ai le fa (4) o a la faguinu. Peitai, ina ua ta'u atu ai e lo'u uso le aofaiga o le faatau, ae toe fesili atu ia te ia po'o maua se katoni/carton sikaleti ae ia tali iai e leai se mea o maua.

"Na ta'amilo le isi alii ui mai i tua o lo'u sister ma titina lona ua agai lalo ma taumafai e tu'u se vailaau o'ona i lona gutu ma fai i lo'u uso pe faapefea ona tatala le masini teutupe (cash register).

"Ae na iloa mai loa e le mafine Saina e ona le faleoloa ina ua e'e lo'u uso i luga, taufetuli loa i fafo ma i laua nei ma sosola ese mai i totonu o le faleoloa," o le faamatalaga lea a le tamaitai ia Oka Junior Fonoti o lo'o mafatia ona ua afaina lona uso i le soligatulafono sa fa'atino e nei talavou e toalua.

O le tamaitai kesia na a'afia sa momoli atu i le falema'i i Motootua ina ua mae'a ona fai lana faamatalaga i le Ofisa o Leoleo i Faleata. 

Ua te'a i tua o ia ma ua fa'atasi atu i lona aiga i Vailoa. Ua faafetaia e sui o le aiga a lea tamaitai le fesoasoani a le mamalu o le atunuu i le sueina o i laua nei.