Nofosala Mo Le 8 Masina I Le To'ese Se Alii Ina Ua Faamaonia Lona Faaoolima Mataga

Fale O Faamasinoga i Mulinuu.

Ata Pueina: Eyespy Radio 87.5FM

E 8 masina o le a nofosala ai i le to'ese se alii 31 tausaga le matua o le soifua mai i Palisi ma Samata-i-Tai ina ua faamaonia lona faia lea o le solitulafono o le fa'ao'olima mataga.

O le ua faamaonia lona faia o lea solitulafono, o Toloa Semi Letoa, sa faigaluega i le kamupani o le Interlinc lea e nafa ma le kilivaina o "pepa valuvalu" poo credit a le kamupani telefoni o le Digicel. 

E  faapea o le tausaga ua tuana'i i le Aso 22 o Aperila na agai atu ai Letoa i Apia mai i Manono-Uta, na ia pikiina mai ai le tamaitai ua aafia i le taeao, sa fia agai mai i lana galuega i Leulumoega-tuai.

O le tama’ita’i na a’afia e faigaluega i se faleoloa i Leulumoega-tuai ma na te le'i mafaufauina o le a faatino e Letoa lea tulaga ona e masani lelei ma le e ona le faleoloa o loo faigaluega ai o ia.

I se lipoti a leoleo, na faaalia ai, ina ua oo mai le taavale paepae SUV a le kamupani sa faaaogā e Toloa i lana galuega, na ia faatu i se vaega o le alatele lata i le malaevaalele i Faleolo ma ia faatino ai le solitulafono.

Na mafai ona alu ese lē na aafia mai i le taavale ma ia alu ane loa faatu ni taavale se lua na agai ane i le taimi lea ma faailoa iai lona fia maua o se fesoasoani mai le gaioiga na faia ia te ia e Letoa.

Na logo leoleo ma suesueina loa le tagi a le tamaitai, ae na te'ena e lē ua molia moliaga a leoleo e faasaga ia te ia.

Ina ua mae’a ona valaau molimau a leoleo ma maua lē ua molia na lē faamaonia ai le tasi o moliaga, ae faamaonia na o le solitulafono o le faaoolima matagā poo le indecent assault.