Sauni Leniu E Faamavae Mai I Le Penrith Panthers
Spencer Leniu
Ata Pueine : RLWC
A'o sauni ai le au o le Penrith Panthers mo a latou taaloga amata o le Taamilosaga Lakapi Liki a Ausetalia mo lenei tausaga, ua faailoa mai e lana Pulega o le fa'aiuga o le tausaga nei o loo fuafua e faamavae ai se tasi o a latou foueti faamoemoeina, le alii o Spencer Leniu, o se sui foi o le Toa Samoa sa auai i le Ipu o le Lalolagi mo le Lakapi Liki i le tausaga ua tuana'i.
I nisi o o faasalalauga o loo i luga o upega tafailagi, na taua ai o loo masalomia o le a taalo ai Spencer Leniu faatasi ma se tasi foi o sui o le Toa ia Stephen Chrichton mo le au a le Cantebury-Bankstown Bulldogs i le tausaga fou.
Peitai, o loo fuafua foi le au a le Sydney (Sini) Roosters) e ofa se konekarate mo Leniu. I se pepa o faamatalaga mai i le au a le Panthers na faasalalau i le Aso Gafua o le vaiaso nei na faamaonia mai ai lea tulaga. Na taua foi e faapea o le tausaga mulimuli lenei o l;e a taalo ai Leniu mo le Panthers.
O Leniu na amata taalo mo le Panthers i le tausaga e 2019, ma ua 61 taaloga na ia taalo ai i le taamilosaga lakapi liki a Ausetalia po'o le N.R.L (National Rugby League). O ia foi o se tasi o tama taalo faamoemoeina a le Panthers. O Leniu e 22 tausaga ma ua faalima ona taalo ai mo le Toa Samoa i le Ipu o le Lalolagi mo le Lakapi Liki sa faia i Peretania i le tausaga ua mavae.
O loo mafatia le Pule Sili o le au a le Panthers ia Matt Cameron ona o le a faamavae se tasi o a latou tama taalo faamoemoeina ae auai atu i se isi kalapu. Ae e ui i lea, na ia faafetaia Leniu ona o lona taimi sa iai i le kalapu a le Panthers.
Ua fa'ailoa mai e le nusipepa o le Sydney Morning Herald o le Sydney Roosters o lo'o fa'amae'aina se konekarate mo Leniu i le 2024, fa'atasi ai ma le alii sa taalo i le Newcastle Knights ia Dominic Young.
Fai mai le Manager a Leniu ia Joe Nakat, e le o le tupe o le mea sili lea e faaosofia ai e fia alu ese o Leniu,
"Sa i ai Spencer iina (Penrith) i le tele o lona olaga atoa, taaalo ma Minchinbury Jets i le ala atoa, o lea na ia iloa ai e matua faigata lava ona mafaufau e siitia muamua," o le tala lea a Nakata.