SAUNI SAMOA E TALIMALO I LE TU'UGA VA'A FA'AVAOMALO A LE LALOLAGI

Sui o le S.O.C.A ia Su'a Jay Ah Fook, Sili Aoao o le S.P.R.E.P ia Sefanaia Nawadra, Minisita o  Punaoa Faalenatura ma le Siosiomaga afioga ia, Toeolesulusulu Cedric Schuster (Ata Pueaina: Lars Gustaf Bell/ Eyespy Radio Samoa)

E $37,000 tala Ausetalia le aofa'i o se fesoasoani tau seleni na foa'i e le S.P.R.E.P e tauala atu i le polokalame ua taua o le Pacific Ocean Litter Program (P.O.L.P) aua le fesoasoani ai lea i tapenaga a le Asosi Alo Va'a Paopao o Samoa (Samoa Outrigger Canoe Association) mo le tu'uga o le  I.V.F Va'a World Distance Championships i lenei tausaga.

I se fono ma le au tusitala i le Aso Lua o le vaiaso nei, na taua ai e le Faatonu Sili Aoao o le S.P.R.E.P ia Sefanaia Nawadra, o le a o latou fesoasoani foi i le tuuina atu lea o faguvai alamini e faaoga e le au alo va'a, ina ia faaitiitia ai le faaogaina o otaota e le mafai ona pala poo plastics.

Na ta'ua e le sui o le S.O.C.A ia Su'a Jay Ah Fook, o le I.V.F Va'a World Distance Championships 2023 o le a mafai ona auai mai ai le silia i le 1000 tagata alo va'a mai i le 28 atunu'u o le lalolagi. O le a vaevaeina lea tu'uga i vaega e 10, o le Junior 16, Junior 19, Open, Master 40, Master 50, Master 60, Master 70, Master 75, Master 80, ma le vaega mo i latou e iai manaoga tumau po'o le Para Mixed Division.

Ina ua fesiligia le Minisita o  Punaoa Faalenatura ma le Siosiomaga, o ia foi o le Minisita o Turisi, ia Toeolesulusulu Cedric Schuster ile aoga o lenei faamoemoe ia Samoa?

Na tali mai o ia o  o pisinisi tau turisi i le lotoifale, mai lava i faletalimalo e oo atu i faleoloa, o le a penefiti uma ia i latou o loo atofa e o mai i Samoa mo lea faamoemoe o le a faia i le Aso 10-Aso 19 o lenei masina.