Sauni Samoa Mo Le Taamilosaga I Kanata

Manu Samoa 7’s

Ata Pueina: HSBC SEVENS

I le mae'a ai o le vae lona 8 o le Taamilosaga Taitoafitu o le Lalolagi (World Sevens Series) sa faatautaia i Los Angeles i le faaiuga o le vaiaso ua tuana'i, ua see atu ai nei Samoa i le tulaga 5 mai i le i le tuufatasiga o ai.

O Samoa na tulaga 3 i le mae'a ai o le vae lona 7 sa faia i Sini i Ausetalia i nai vaiaso ua mavae. Peitai, ua tulaga 5 nei le Manu Samoa e 81 ona ai, tulaga muamua Niu Sila e 102 ai, lona lua Argentina e 86 ai, tulaga tolu ai Aferika i Saute e 86 foi ona ai, ma Fiti i le tulaga fa e 84 ai.

O le faaiuga o le vaiaso ne o le a faatautaia ai le vae lona 9 o le World Sevens Series i totonu o Kanata. O Samoa o loo i le Pulu A ma Niu Sila lea na suipi i le Ipu Autu o le vae i Los Angeles, o Amerika, faapea ai ma le au a Chile mai Amerka i Saute.

Na taua e se tasi o sui o le Manu Samoa Taitoafitu ia Paul Eti Slater i se tasi o faasalalauga a le World Rugby Sevens, o le faanaunauga o loo o la tou taumafai ia maua e Samoa le avanoa e saofaga atu ai mo le Olimipeka.

E pei ona silafia, a maea le taamilosaga taitoafitu o loo faagasolo, o au e fa pito i luga i le faatulagaina o ai o le a otomeki lava ona saofaga atu mo le Olimipeka.

Na ia saunoa foi o le au ua iai nei ua pei o ni auuso, ma e taalo le isi mo le isi, o le ala lea ua ala ai ona ese le maualuga o le taumafaiga a le Manu e pei ona vaaia.

Na taua foi e le faiaoga lagolago o le Manu ia Faamaoni Lalomilo, o se tasi o itu o loo faataua e le au, o le auai lea i sauniga lotu e le gata i le afiafi ao taimi foi e faatautaia ai a latou toleniga.

O le aso ananafi na faauma ai le taamilosaga i Los Angeles, ma na manumalo Niu Sila i le Ipu, lona lua Argentina, lona tolu Fiti, fa Ausetalia ae tulaga lima ai Samoa ina ua manumalo ia Peretania Tele e 24 - 19.