SAUNI STEPHEN CRICHTON E TA'ALO I LE 'AU A LE N.S.W INA UA LAVEA LATTRELL MITCHELL

Stephen Crichton

Ata Pueina: Love Rugby League

Ua tofia nei e le Faiaoga Ulu o le 'au a le New South Wales Blues ia Brad Fittler se tasi o sui o le Toa Samoa ia Stephen Crichton i totonu o lana 'au mo le State of Origin ina ua fa'amanu'alia le ali'i o Lattrell Mitchell.

O lea fa'ai'uga ua afua ona faia e Fittler ona o le talosaga a foma'i e le mafai ona ta'alo Lattrell Mitchell i le ta'aloga lona lua o le State of Origin i le Aso 21 o Iuni ona o lo'o afaina le maso o lona vae.

O Stephen Crichton na iloga lana ta'alo mo le 'au a le Penrith Panthers lea e fa'alua ona o latou manumalo i le Ipu Autu o le ta'amilosaga o le National Rugby League a Ausetalia. Ma o ia fo'i na kikiina le kolopu kiki na manumalo ai le Toa Samoa ia Egelani i le semi-final o le Ipu o le Lalolagi i le tausaga na te'a nei.

E tatau i le 'au a le N.S.W ona manumalo i le ta'aloga o lo'o loma nei pe afai e manao e faia se ta'aloga lona tolu e sailia ai le siamupini o le State of Origin.

Ma o le ta'aloga o le a faia nei i le malae ta'alo o le Suncorp Stadium, o le home game a le 'au a le Queensland Maroons.

O le ta'aloga muamua na malolo ai N.S.W i 'ai e 18 - 26 a Kuiniselani.