TAU O LE PENISINI MO LE MASINA MUAMUA O LE 2023

Ata Pueina: Eyespy Radio

Ua fa’amatu’u mai nei e le Matagaluega o Tupe le tau o le suau’u mo le masina o Ianuari ua fa’amaonia ai le pa’ū  o le tiso mo lenei masina
mai le $4.16 i le lita i le $3.96 i le lita, ae o le kerosene ua pa’ū mai le $3.57 i le lita mai le masina o Tesema i le $3.49 i le lita mo
Ianuari.

O le a tumau pea le tau o le penisini i le tau o Tesema lea e  $3.34 i le lita. Ua fa'ailoa e le Minisita o Tupe le afioga ia Mulipola Anarosa Ale le
tulaga o lo'o i ai nei o le suau'u ma penisini i le pa'u o le tamaoaiga i le lalolagi atoa.

O lea ua valoia o le a atili ai ona aafia tau o suauu i le lalolagi ma le pulega o le sapalai o le Faalapotopotoga o Atunu'u Fa'atau atu
Suauu (O.P.E.C.).

I se faatalatalanoaga a lenei leitio ma nisi o le mamalu o avetaavale la'upasese sa fa'ali le fiafia ina ua amata ona pau le tau o le tiso.
Sa saunoa le alii avetaavale o le Taxi Stand o le Tafa'ifoe ia John Ponaivao ua avea lenei pau ma faamamaavega ia tei latou le au ave
taxi.

"Manaia le pau o le tiso lenei amataga o le tausaga , talosia ia ae toe pau fo'i lisi masina oi luma aemaise lenei vaitau ua alualu i luma
le taugata o le soifuaga" saunoa ai le alii ia John Ponaivao

I le taimi nei, o le fesuisuiai o tau o le tiso o loʻo faʻaauau pea ona mafua mai i le taua a Rusia ma Iukureini  lea na amata mai le 24 o
Fepuari i le tausaga 2022 ma mafua ai le faʻaitiitia o sapalai o oloa suauʻu mai Rusia i Europa.

E ui ina sa iai ni suiga na fa'amauina i le masina na te'a nei, ae o le tulaga vaivai o le Tala Samoa i le tala Amerika o lo'o fa'aauau pea
ona a'afia ai le si'itia o tau o oloa mai fafo.