"TELE LE SOLITULAFONO I LUGA O UPEGA TAFAILAGI"

Ata pueina: Eyespy Radio 87.5 FM

O lo'o faagasolo nei e le Matagaluega o Leoleo ma Falepuipui ni suesuega e faatatau i soligatulafono o loo faia i luga o upega
tafa'ilagi. O lea ua galulue faatasi ai nei le Matagaluega ma se sui mai le Ofisa Leoleo i Niu Sila ina ia fo'ia le tele o mataupu ua
ali'ae mai totonu o Samoa ma le Pasefika.

O le alii ia Enoka Feterika mai le Matagaluega o Leoleo i Niu Sila ua taula ai nei le faatinoga o nei suesuega. E lua vaiaso o loo
faatinoina ai lenei aoaoga mo sui mai le Matagaluega o Leoleo i Samoa. I nisi o mata'upu o loo faamamafaina nei, ua faasino lea i le mamalu
lautele o i latou o lo'o maimoa i ni ata le talafeagai ao aafia ai alo
laiti (child pornography). O nisi o solitulafono o loo aafia foi i lenei vaega o le taufaavalea, solitulafono tau tupe ma le lafoina lea
o faamatalaaga taufaasese.

I se faatalatalanoaga ma le Afioga ia Enoka Feterika , sa ia faamalamalamaina ai le aoga tele o lenei polokalame mo le Matagaluega
o Leoleo. O lo'o avea pea le saogalemu o le mamalu o le atunuu ma faamuamua o le Matagaluega , ma o le ala fo'i lea ua faatinoina ai
lenei aoaoga.

E le'o mafai ona faailoa mai e Enoka le auala o lea faatinoina ai nei o latou suesuega. Ae o loo ioio ma talotalo pea le Matagaluega ina ia
fo'ia soligatulafono i luga o Upega tafailagi mai nisi fo'i ua iai tomai faapitoa i lea vaega.

E tusa ai ma le fonotaga a le Pacific Transnational Crime Network (P.T.C.N) na faia i Samoa i le 2022, na ta‘ua ai o Samoa o se tasi lea
o le tele o atunuu o loo maitauina le maimoa i ata le talafeagai  i luga o Upega Tafailagi. Na folasia talanoaga i luga o le laulau i le
tulaga lamatia ma le saogalemu o tagata Pasefika ma auala e mafai ai ona latou foia le tulai mai o nei faafitauli.