TOE AMATALAIA A'OA'OGA I AMERIKA SAMOA E UI O LOO PEPESI LE MISELA

E ui o lo'o pepesi le fa'ama'i o le misela i totonu o Amerika Samoa, ae o lea ua toe tatala ma amatalia uma a'oga a le teritori. o lo'o fa'amalosia matua e ave fanau e fai a latou tui puipui fa'ato'a mafai ai lea ona auai i a'oga.

O lea taimi nei, e to'alua ni mataupu ua fa'amaonia o le misela ma le 52 o lo'o masalomia ua a'afia. I se fa'asilasilaga talu ai, na fuafua e tapunia uma a'oga se ia toe a'e i le Aso 12 o lenei masina o Me.

O a'oga uma o le a tatala se'i vagana ai aoga fa'ata'ita'i o le a tapunia pea, ae o le a fa’aauau pea le faiga o tui puipui mo tamaiti ma fanau laiti e le Matagaluega o le Soifua Maloloina.

Na taua e le foma'i su'esu'e fa'apitoa i fa'ama'i pepesi po'o le epidemiologist ia Scott Anesi o lo'o galue ai i totonu o Amerika Samoa, o le taimi nei ua fa'aitiitia le fuainumera o i latou na valaau atu i le laina telefoni a le falema'i e ripoti atu ua a'afia i le misela, ma ua fa'aitiitia fo'i le aofa'i o i latou ua a'afia sa asia le maota gasegase.

"E ui i lea tulaga, e le'o taofia ai le galulue pea o le Matagaluega e fa'atino pea tui puipui o le misela.

Na ia saunoa fo'i o lo'o talafeagai le toe amatalia o a'oga ona ua o'o atu i le 97% le fuainumera o fanau aoga i kolisi maualuluga ma aoga tulaga lua ua mae'a ona faia tui puipui. 

Na ia taua foi e lua mataupu ua faamaonia le maua ai lea i le misela, o le isi o le teineititi e valu tausaga le matua, ae o le isi o le tamaititi e fa tausaga le matua mai Tafuna.

Photo: RNZ