Tumau Pea Le Talitā Ile T.I.R Moata'a

T.I.R (Taumeasina Island Resort) Moata'a

Photo: TIR Moataa

O lo'o tumau pea le Talitā mo le Senior A poo ali'i matutua i le ta'amilosaga lakapi taitoasefulualelima a  le Iuni Lakapi o Apia i le au malosi a le T.I.R (Taumeasina Island Resort) Moata'a ina ua manumalo i le la taaloga ma Letogo i le Aso To'ona'i ua tuana'i.

O le vaiaso ua te'a e lua iai vaiaso talu ona toe amata lea ta'amilosaga a le Iuni Lakapi a Apia.

O le vaiaso muamua o le Ta'amilosaga na se'i mai ai e le T.I.R Moata'a le Talitā mai i le Apia Maroons.

Ae o le Aso To'ona'i ua mavae na vaai ai le malosi telē o le T.I.R Moata'a i le taaloga ma Letogo.

Ina ua mae'a le 80 minute o le taaloga, na iloga ona faamoamoa e Moata'a le osofaiga a Letogo ma e lei mafai ona laasia e Letogo le laina sikoa a Moata'a.

O le iuga o lea taaloga, T.I.R Moataa e 33, Letogo e na'o le tolu a latou ai mai i se sala agai i le po'u.

O le T.I.R Moata'a o lo'o taaalo mai ai nisi o sui tuai o le Manu Samoa Taitoafitu e pei o Johnny Vaili, Tulolo Tulolo.

Na taua e se tasi foi o sui ua leva ona taalo mo le au a le T.I.R Moata'a ia Paul Faalogo, o lo'o taumafai pea lana au ina ia maualuga se tulaga latou te ausia i lenei tausaga.

"Oute iloa e fai a si faigata o lenei tausaga ona e malolosi uma au o loo auai.

"Ae a faamaoni I taimi o toleniga ma faaoga fautuaga a le alii faiaoga oute iloa e mafai ona matou ausia se tulaga lelei," saunoa Faalogo.